Kukwe kira 57

Ngöbö David mikani reire

¿DRE namani bare ye tuin mäi? Monso chi käkwe obeja ngäbä mikani kwäre oso kisete. Oso nikani obeja ngwena kwetadre jai. Akwa monso chi nikani jiebiti aune obeja mikani kwäre kwe oso kisete. Oso nükani krö angwane, ¡monso chi käkwe kämikani! Köbö mada te monso chi käkwe obeja mikani kwäre lion kisete. Monso chi kukwe nuainbare yebätä kä jürä ñaka, ¿ñan ererea? ¿Monso chi ye nire gare mäi?

Monso ye David. Niara nünanka juta Belén känti. Niara ruai abokän Obed, Obed ye Rut bätä Boaz monsoi. ¿Niaratre tä törö mäi? David rün abokän Jesé. David nämene obeja rünkwe ngübare. Jehová Saúl mikani reire ye bitikäre kä nikani kwäjätä ta angwane David därebare.

Jehová niebare Samuel ie: ‘Mä aseite ütiäte dian keteiti aune mä rika Belén Jesé gwirete. Niara monsoi mikani iti reire tikwe.’ Samuel ie Eliab Jesé monsoi mubai ye jutuabare angwane, niebare kwe jai: ‘Niara ara raba ruin tie.’ Akwa Jehová niebare ie: ‘Niara nga kwin bätä bä nuäre ye ñan ai mika ñärärä mäkwe, tikwe ñan niara ai dianinkä reire.’

Jesekwe, ngobo Abinadab käräbare aune jänikani kwe Samuel ie. Akwa Samuel niebare ie: ‘Jehová ñaka niara ai dianinkä reire.’ Ye bitikäre, Jesé jatani ngobo Sama ngwena. ‘Jehová ñaka niara ne dianinkä,’ Samuel niebare ie. Jesé nükani monsoi ni kükü ngwena Samuel ie, akwa Jehová ñaka dianinkä jire iti. ‘¿Monsotre ne ngörä?’ Samuel ngwanintari.

‘Nebe iti abokän bäri bati. Akwa tä obeja ngübare,’ niebare Jesekwe. David jänükani angwane namani tuin bä nuäre Samuel ie. ‘Ni ne ara,’ niebare Jehovakwe. ‘Aseite keke niarabiti.’ Ye erere Samuel nuainbare. Ye bitikäre David namani reire Israel.

1 Samuel 17:34, 35; 16:1-13.