Mukuru ma toorora David
EHUNGI 57
Mukuru ma toorora David
OVE mo munu kutja pa tjitwa tjike? Omuzandona wa yama ondjona ndjo kongu. Ongu ye ya nu ai toora ondjona nai vanga okukarya. Nungwari omuzandu we i tezera, nu a yama ondjona motjinyo tjongu. Nu ongu tji ye mu sekamena omuzandona wa kambura ongu nu a tono nga tja zepa! Poruveze rwarwe eye wa yama onḓu kongeyama. Ka muzandona ependa ngo nao? Ove mo tjiwa kutja eye owaṋi?
Omuzandona ngwi oDavid. Eye wa turire motjihuro tjaBetlehem. Ihe mukururume wa ri Obed, omuzandu waRut na Boas. Ove mo ve zemburuka? Nu ihe yaDavid oIsai. David aa ṱakamisa ozonḓu zaihe. David wa kwatwa ozombura 10 kombunda yaindu Jehova tja toorora Saul okurira ombara.
Oruveze tji rwa yenena Jehova wa raera ku Samuel na tja: ‘Toora omaze yapeke nu u yende konganda yaIsai mu Betlehem. Ami mba toorora umwe wovazandu ve ma rire ombara.’ Samuel tja muna Eliab, omuzandu waIsai otjiveri, we rihungirira omuini a tja: ‘Ingwi tjiri ongwa toororwa i Jehova.’ Nungwari Jehova wa tjere ku ye: ‘O tara koure nomuhapo we omuwa. Ami ka ngu mba toorora okurira ombara.’
Tjazumba Isai wa isana omuzandu we Abinadab nu e mu eta ku Samuel. Nungwari Samuel wa tja: ‘Kako, Jehova ka ngwa toorora wina.’ Okuzambo Isai wa eta omuzandu we Sima. Samuel wa tja: ‘Kako, Jehova ka ngwa toorora wina.’ Isai wa eta ovazandu ve hambombari ku Samuel, nungwari Jehova kena pa toorora umwe wawo. Samuel wa pura: ‘Imba oovazandu voye avehe?’
Isai we mu zira: ‘Pe na ingwi ongero, nungwari eye wa karisa ozonḓu.’ David tja kaetwa, Samuel wa muna kutja eye omuzandona wombunikiro ombwa. Jehova wa tja: ‘Ongu ri ye ngwi, mu tirira omaze.’ Nu Samuel wa tjita nao. Oruveze maru ya indu David tji ma rire ombara yaIsrael.
