Ngewa ya 57: Ngai Ainyuva Ndaviti
WE NŨKWONA ũndũ kweekĩka? Kĩmwana kĩĩ nĩkyavonokya katena ka ĩlondu kuma vala ve nduva. Ĩ nduva yooka yakua katena kau ka ĩlondu nĩ kana ĩkaye. Ĩndĩ kĩmwana kyamĩsembany’a na kyavonokya katena kau kuma kanywanĩ wayo. Na yĩla nduva ĩsu yookĩlile, kĩmwana kyamĩkwata na kyamĩkũna kyamyũaa! Ĩvinda yĩngĩ nĩkyavonokisye ĩlondu kuma vala ve mũnyambũ. Kĩĩ kyo tyo kĩmwana ngũmbaũ? Nĩwĩsĩ kyo nũũ?
Ũũ nĩ mwanake Ndaviti. Ekalaa ndũanĩ ya Mbetheleemu. Ũmae wake aĩ Oveti, mwana wa Luthi na Mboasi. We nũũmalilikana? Ĩthe wa Ndaviti aĩ Yese. Ndaviti aĩthasya malondu ma ĩthe. Nake asyaiwe myaka 10 ĩtina wa Yeova kũnyuva Saulo atw’ĩke mũsumbĩ.
Na ĩvinda yavika ĩla Yeova wamwĩie Samueli: ‘Osa mauta ma mwanya na ũithi nyũmbanĩ ya Yese ndũanĩ ya Mbetheleemu. Nyie nĩnĩmũsakũĩte ũmwe wa ana make ethĩwe mũsumbĩ.’ Yĩla Samueli wamwonie Eliavu mwana ũla mũkũũ wa Yese, asya ngoonĩ: ‘Vate ndĩi ũũ nĩwe Yeova ũnyuvĩte.’ Ĩndĩ Yeova amwĩa: ‘Ndũkasisye ũtũlu wa kĩũngamo kyake kana ũndũ wanakavĩte. Nyie ndimũnyuvĩte atw’ĩke mũsumbĩ.’
Kwoou Yese eeta mwana wake Avinatavu na amũete kwa Samueli. Ĩndĩ Samueli asya: ‘Aiee, Yeova ndamũnyuvĩte ũũ o nake.’ Na kũatĩĩa ũsu, Yese amũete Samama mwana wake. Nake Samueli asya, ‘Aiee, o na ũũ Yeova ndamũnyuvĩte. Yese amũetee Samueli ana make mũonza, ĩndĩ Yeova ndaanyuva o na ũmwe katĩ woo. Ĩndĩno Samueli akũlya: ‘Aa nĩmo ana maku onthe?’
Nake Yese amwĩa, ‘Nĩvatiele o ũla mũnini. Ĩndĩ nũkũĩthya malondu.’ Ndaviti aetwe, Samueli oona kana nĩ mwanake mũmbe nesa. Yeova nake asya: ‘Ũũ nĩwe. Mwĩtĩkĩsye mauta.’ Na ũu nĩw’o Samueli ũnũkwĩka. Ĩvinda yĩkavika yĩla Ndaviti ũkatw’ĩka mũsumbĩ wa Isilaeli.
1 Samueli 17:34, 35; 16:1-13.
Makũlyo
- Kĩmwana kĩĩ kĩ vaa visanĩ kĩtawa ata, na twĩsĩ ata kana kyo nĩ ngũmbaũ?
- Ndaviti ekalaa va, na ĩthe na ũmae wake meetawa ata?
- Yeova eeie Samueli athi nyũmbanĩ ya Yese kũya Mbetheleemu nĩkĩ?
- Kweethĩiwe ata yĩla Yese waetie ana make mũonza vala ve Samueli?
- Ndaviti aetwe, Yeova eeie Samueli ata?
Makũlyo ma kwongeleela
- Soma 1 Samueli 17:34, 35.
Maũndũ asu mekindĩlĩĩla ata ũkũmbaũ wa Ndaviti na kũmwĩkw’atya Yeova? (1 Sam. 17:37)
- Soma 1 Samueli 16:1-14.
Ndeto sya Yeova nthĩnĩ wa 1 Samueli 16:7 syĩtũtetheesya ata kwĩthĩwa tũte endeesya ma andũ na kwĩvathana na kũsilĩla andũ kwĩanana na ũndũ mekwoneka mailyĩ methonĩ maitũ? (Meko 10:34, 35; 1 Tim. 2:4)
Ngelekany’o ya Saulo yĩonany’a ata kana yĩla Yeova waumya veva wake mũtheu kuma mũndũnĩ, mwanya ũsu nũtonya kusũw’a nĩ veva mũthũku, kana wendi wa kwĩka naĩ? (1 Sam. 16:14; Mt. 12:43-45; Aka. 5:16)
