ПЛЪАГУРЭ мыбдеж къыщыхъуар сытми? ЩІалэм мыщэм иримыгъэшхыу щынэ цІыкІур къригъэлащ. Мыщэр къакІуэри ишхыну щынэ цІыкІур ихьащ. Ауэ щІалэр кІэлъыщІэпхъуэри, щынэ цІыкІур мыщэм и жьэм къыжьэдитхъыжри къригъэлащ. Мыщэр и пхэлъакъуэмкІэ ува нэужь, щІалэр еуэри зэшэзэпІэу иукІащ! Иджыри зэ аслъэным мэл къытрихыжащ. Сыту хахуэІуэ мы щІалэр, пэжкъэ? ПщІэрэ ар хэтми?

Мыр щІалэщІэ Даутщ. Ар Вифлеем щопсэу. Абы и адэшхуэр Овидщ, Руфрэ Воозрэ я къуэращ. ПщІэжрэ ахэр хэтми? Абы и адэр Иессэщ. Даут и адэм и мэлхэр егъэхъу. Ар къыщалъхуар Иеговэ ТэлутІ пащтыхьу зэрыхихрэ илъэсипщІ дэкІа нэужьщ.

Зэман докІри Иеговэ Самуел жреІэ: «Дагъэ хэхар къащти Вифлеем Иессэ и унэм кІуэ. Абы и къуэхэм щыщ зы пащтыхьу къыхэсхащ». Самуел Иессэ и къуэ нэхъыжь Елиав къилъэгъуа нэужь, и гукІэ жеІэ: «Мырауэ къыщІэкІынщ Иеговэ къыхихар». Ауэ Иеговэ жеІэ: «Уемыплъ абы и инагъымрэ и дахагъымрэ. Аракъым пащтыхьу къыхэсхар».

ИтІанэ Иессэ и къуэ Аминадав къоджэри Самуел деж къешэ. Ауэ Самуел жеІэ: «Хьэуэ, иджыри мыракъым Иеговэ къыхихар». Иессэ и къуэ Самму къешэ. «Хьэуэ, мыракъым иджыри Иеговэ къыхихар». Иессэ Самуел къыхуешэ и къуиблыр зэкІэлъхьэужьу, ауэ зыри абыхэм щыщу къыхихкъым Иеговэ.

— Мыра уи къуэхэр псори зэрыхъур?— щІоупщІэ Самуел.

— Иджыри зы, нэхъыщІэ дыдэр, щыІэщ,— жеІэ Иессэ.— Ауэ иджыпсту ар щыІэкъым, абы мэл егъэхъу. Даут зи цІэ теплъэ гуакІуэ зиІэ щІалэщІэр Самуел къыхуашэ. «Мыращ ар,— жеІэ Иеговэ.— ТекІэ абы дагъэр». Самуел Алыхьым зэрыжиІам хуэдэу ещІ. Ауэ иджыри зэман гуэр дэкІынущ, Даут Израилым и пащтыхь хъун ипэ.