MWANA ya bakala yai ya beno kemona mekatuka na kugulusa mwana dimeme na manzungulu ya ours. Ours kwisaka kukanga mwana dimeme sambu na kudya yandi. Yandi landaka ours, kangaka yandi, mpi botulaka yandi mwana dimeme. Mbisi kuwaka makasi mpi kutelamaka, kansi mwana ya bakala kangaka yandi, bulaka yandi, mpi fwaka yandi! Mbala yankaka yandi gulusaka dimeme na munoko ya nkosi. Yandi kele mpenza mwana bakala ya kikesa. Zina na yandi nani?

Zina na yandi David. Yandi vandaka kuzinga na Bétleheme. Nkaka na yandi vandaka Obed, mwana ya Ruti ti Boaz. Beno keyibuka dyaka bantu yai zole? Tata na yandi kele Jesse. David vandaka kulangidila bitwisi ya tata na yandi. Yandi butukaka bamvula 10 na nima ya ntangu yina Jéhovah solaka Saül bonso ntotila.

Kilumbu mosi, Jéhovah tubaka na Samuel nde: ‘Baka mafuta mpi kwenda na Bétleheme, na nzo ya Jesse. Mono mesola mwana na yandi mosi bonso ntotila.’ Ntangu Samuel kumaka na Bétleheme mpi yandi monaka Eliab, mwana ya ntete ya Jesse, yandi kuditubilaka nde: ‘Ziku yandi yai Nzambi mesola.’ Kansi Jéhovah songaka yandi nde: ‘Kutala ve kitoko na nda na yandi. Mono mesola yandi ve bonso ntotila.’

Jesse bingaka Abinadab mpi songaka yandi na Samuel yina tubaka nde: ‘Yandi mpi Jéhovah me sola yandi ve.’ Na nima Jesse songaka Shamma mpi Samuel tubaka nde: ‘Yai mpi ve, Jéhovah mesola yandi ve.’ Jesse songaka Samuel bana na yandi ya babakala nsambwadi, kansi Jéhovah kusolaka ata mosi ve na kati na bau. Samuel yufulaka nde: ‘Keti bana na nge yonso, bau yai kaka?’

Jesse vutulaka nde: ‘Mebikala dyaka leke na bau, kansi yandi kelangidila mameme.’ Ntangu bau bingaka David, Samuel monaka nde yandi vandaka kitoko kibeni. Jéhovah tubaka nde: ‘Yandi yai, pakula yandi mafuta.’ Samuel salaka mutindu yina. Na yau kilumbu zolaka kukwisa ya David zolaka kukuma ntotila ya Israele.