NĨ ŨRONA ũrĩa gwekĩka? Kĩmwana gĩkĩ kĩahonokia kagondu gaka kuuma kwĩ nduba. Nduba yokĩte kũhuria kagondu ĩkarĩe. Nakĩo kĩmwana gĩkĩingatana nacio, na gĩgĩkĩhonokia kagondu kuuma kanua ka nduba. Na rĩrĩa nduba yaakĩrũgĩrĩire-rĩ, gĩkĩmĩnyita na gĩkĩmĩũraga. Na ihinda rĩngĩ gĩkĩhonokia ng’ondu ĩmwe kuuma kanua ka mũrũthi. Na githĩ ti kĩmwana njamba? Nĩ ũũĩ gĩetagwo atĩa?

Ũyũ nĩ Daudi. Atũũraga itũra-inĩ rĩa Bethilehemu. Gukawe eetagwo Obedi, mũriũ wa Ruthu na Boazi. Wahota kũmaririkana? Na ithe wa Daudi nĩ Jesii. Daudi aarĩithagia ng’ondu cia ithe. Daudi aaciarirũo mĩaka ikũmi thutha wa Jehova kwamũra Saulu atuĩke mũthamaki.

Rĩu ihinda rĩgĩkinya rĩrĩa Jehova eerire Samueli atĩrĩ: ‘Oya maguta ma mwanya na ũthiĩ nyũmba-inĩ ya Jesii Mũbethilehemu. Nĩ thuurĩte ũmwe wa ariũ ake atuĩke mũthamaki.’ Rĩrĩa Samueli onire Eliabu mũriũ ũrĩa mũkũrũ wa Jesii, akĩĩra: ‘Ti-itherũ ũyũ nĩwe Jehova athurĩte.’ No Jehova akĩmwĩra ũũ: ‘Tiga kũbaara kĩũga gĩake kana ũthaka wake. Ũyũ tiwe thurĩĩte atuĩke mũthamaki.’

Ningĩ Jesii agĩĩta mũrũwe Abinadabu na akĩmũrehere Samueli. Nake akĩmwĩra atĩrĩ: ‘O nake ũyũ tiwe ũthurĩtwo nĩ Jehova.’ Thutha ũcio, Jesii akĩrehithia Shama. Samueli akiuga, ‘O na ũyũ tiwe ũthurĩtwo nĩ Jehova.’ Jesii agĩkĩhĩtũkithĩria ariũ ake mũgwanja harĩ Samueli, no Jehova ndathurire aya. Samueli akĩũria Jesii atĩrĩ, ‘Ĩ ciana ciaku ciothe irĩ haha?’

Jesii agĩcokia ũũ: ‘Nĩ hatigarĩte ũrĩa wa kĩhinganda, na atĩrĩrĩ, e rũũru.’ Rĩrĩa Daudi aarehirũo-rĩ, Samueli akĩmũbaara akĩona aarĩ mwanake mũthaka akĩonwo. Nake Jehova akiuga atĩrĩ, ‘Ũyũ nĩwe. Ũkĩra ũmũitĩrĩrie maguta.’ Na ũũ nĩguo Samueli eekire. Ihinda nĩ rĩgũũka rĩrĩa Daudi arĩtuĩka mũthamaki wa Isiraeli.