NANCHI wamona kyamwekele nyi? Nsongwalume wapokolwele uno mwana mukooko ku mbeyala. Mbeyala waishile ne kusompola mwana mukooko amba amuje. Bino nsongwalume wapupijile ne kupokolola mwana mukooko mu kanwa ka mbeyala. Kabiji mbeyala byo abukile bukaji, nsongwalume wakwachile mbeyala ne kumwipaya! Pa kimye kikwabo, wapokolwele mukooko mu kanwa ka bokwe. Nanchi kechi wajinga nsongwalume wa ngovu nenyi? Abya wamuyuka nyi?

Uno nsongwalume ke Davida. Waikalanga mu muzhi wa Betelema. Bankambo yanji bajinga ba Obeda, mwana wa ba Luta ne Boaza. Nanchi wibavulukamo nyi? Bashanji Davida bajinga ba Yese. Davida walamanga mikooko ya bashanji. Davida wasemekelwe byo papichile myaka jikumi kufuma kimye Yehoba kyo asajile Saulo kwikala mfumu.

Kimye kyafikile Yehoba kyo aambijile Samwela amba: ‘Tola manyi ne kuya ku nzubo ya kwa Yese mu Betelema. Nasala umo mu baana banji kwikala mfumu.’ Byo amwene mwana mubeji wa kwa Yese, aye Eliaba, Samwela wiambijile mwine amba: ‘Kinetu, uno ye ye asalulula Yehoba.’ Bino Yehoba wamwambijile’mba: ‘Kange utale pa byo alepa nangwa kumwekana kwanji bulongo ne. Kechi namusala kwikala mfumu ne.’

Onkao mambo, Yese waichile mwananji Abinadaba ne kumuleta kwi Samwela. Bino Samwela waambile’mba: “Nangwatu uno kechi i ye ye asalulula Yehoba ne.” Kulondelapo, Yese waletele mwananji Shama. Samwela waambile’mba: “Ne uno naye, kechi i ye ye asalulula Yehoba ne.” Byonkabyo, Yese waletele baana banji batanu na babiji kwi Samwela, pano bino, Yehoba kechi wasajilepotu nangwa umo ne. Samwela waipwizhe’mba: ‘Baana benu bonse bo bonka bano bajiko nyi?’

Yese waambile’mba: ‘Kwashalatu yenka mukala, bino ubena kufunga mikooko.’ Davida byo bamuletele, Samwela wamwene’mba wajinga nsongwalume walamba bingi. Yehoba waambile’mba: ‘Imana, umwitulwile manyi, mambo i ye uno.’ Kabiji Samwela waubile byonka bino. Kimye kikafika Davida kyo akekala mfumu wa bena Isalela.