ACHO pa chɔɔ nyɛ yɔŋnuŋndo? Saa fɔŋndɔɔ hoo poombɔɔ hoo kiindiaa visi biyaa o ba ni. Visioo hoo huŋ bii saa fɔŋndɔɔ hoo ni mbo wa kɔndaŋ a ndu le dio. Kɛ mi poombɔɔ hoo nyaanuŋ ndu kɔɔli, mbo kɔ puu ndu visi biyaa hoo o sondo. Nduyɛ mɛɛ visi biyaa hoo simul ndu le sɔŋgaa, mbo dii ndu pɛ! Paale pilɛ vɛlɛ, mbo kiindiaa saa mɛɛ kpɔkuŋndo hiŋ le ndu biyɔɔ. O cho kɔl sikpaa le poombɔɔ hoo nɔ naa le? A sina pa wana cho hoo wo?

Deeve cho hoo ni. Bɛtilihɛm chiee o wa ichali ni. Obɛɛ wa finya ndɔ mama ni, po Lutu nda Bowaa velu wo. A loonuŋ nda pa? Nduyɛ Chɛɛse wa finyaa Deeve ni. Saa finya nduaa ndoo manda ni. Mɛɛ Jɛhowa hɛli Sɔɔl le mbo wa masa, wɔsilaŋ tɔ laa hiou ni mi Deeve vialuŋ.

Boondei fuuluu le mi Jɛhowa dimul Samiɔŋ isɔɔ. Mbo dimi aa: ‘Chua chuɛima chuŋ kɛndiaŋ nyɛɛmbɔ ma kuɛ o Chɛɛselo chiɛiniŋ Bɛtilihɛm. I Hɛli puaa nduaa o pilɛ le mbo wa masaa.’ Mɛɛ Samiɔŋ che Ilayabi, po tase Chɛɛseo, mbo dimuluŋ ndupila aa: ‘A tonya kpeekpei, wana Jɛhowa hɛli wo cho hoo ni.’ Kɛ mi Jɛhowa dimul ndu aa: ‘O cho dialuŋ bɛndoŋ te ŋ tofa le, kɛlɛŋgaa bɛɛ bandii bɛnduei, baa naŋɔɔ. O cho ndule ya hɛli mbo wa masa le.’

Mi Chɛɛse veelu Abinadaa po ndɔ, okoŋ mbo chɔm Samiɔŋ ndu. Kɛ mi Samiɔŋ dimi aa: ‘Sako, o cho hoo pɛŋ te Jɛhowa hɛli le.’ Mi Chɛɛse kɔ huŋ vɛlɛ a po ndɔɔ o pilɔɔ diolaŋ Shama. Mi Samiɔŋ dimi vɛlɛ aa: ‘O cho ndu le Jɛhowa hɛli kposoŋ te.’ Mɛɛ mi Chɛɛse huŋ a puaa nduaa ŋɔmmɛuwaa wa loŋnda kpou naa Samiɔŋ cha, kɛ Jɛhowa hɛli wana o wana nda tɛɛŋ te. Mi Samiɔŋ nyuna ndu aa: ‘Mɛɛ puaa numnda kpou cho haa ni?’

Mi Chɛɛse dimi aa: ‘Pɔmbɔ nda cho. Kɛ o cho saa mandaa.’ Mɛɛ nda kɔ huŋ a Deeve, mi nyɔɔ hɛnaŋ Samiɔŋ tau. Mi Jɛhowa dimi aa: ‘Ndu kpeekpei cho hoo ni. Tala ndu chuɛima chuŋ kɛndiaŋ o lebol.’ Nduyɛ mi Samiɔŋ tosa lende. Boondei cho fuuluu mi Deeve simnuŋ masaa le Isɔluɛi.