ပူ ၅၇
ယွၤဃုထၢဒၤဝံးအဂ့ၢ်
တၢ်မၤအသးန့ၣ် နထံၣ်ဧါ. သးစၢ်အံၤ မၤပူၤဖျဲးအသိဖိလၢ တၤသူဖးဒိၣ်အစုပူၤလီၤ. တၤသူဖးဒိၣ်န့ၣ် ဟဲထုးန့ၢ်သိဖိဒီး သါကအီၣ်ဝဲန့ၣ်လီၤ. ဘၣ်ဆၣ် သးစၢ်အံၤ လူၤပိာ်တၤသူအခံဝံၤ မၤပူၤဖျဲးဝဲ သိဖိလၢ တၤသူအကိာ်ပူၤန့ၣ်လီၤ. ဖဲတၤသူဖးဒိၣ် သါကခီၣ်ရီၣ်အီၤအခါ ဖီၣ်စှီၤဝဲဒၣ်အီၤဝံၤ တီၢ်သံကွံာ်ဝဲလီၤ. ဘၣ်တဘျီအခါန့ၣ် မၤပူၤဖျဲးဝဲဒၣ်သိဖိတဒုလၢ ခ့ယုၢ်အစုပူၤန့ၣ်လီၤ. တမ့ၢ်ဘၣ်သးစၢ် လၢအသးဒူဝဲဘၣ်န့ၣ်ဧါ. အဝဲဒၣ်မ့ၢ်မတၤလဲၣ်. သုသ့ၣ်ညါဧါ.
သးစၢ်ဒၤဝံးသၢၣ်. အဝဲအိၣ်ဝဲဒၣ်လၢ ဝ့ၢ်ဘ့ၤသလ့ဃ့ၣ်န့ၣ်လီၤ. အဖုန့ၣ်မ့ၢ် ရူၤသးဒီးဘိၤဧးအဖိခွါ ဧိၤဘ့းလီၤသၢၣ်. သူတိၢ်နီၢ်အဝဲသ့ၣ်ဘၣ်ဧါ. ဒၤဝံးအပၢ်တခီ မ့ၢ်ဝဲယံးၡဲလီၤ. ဒၤဝံးကွၢ်အပၢ်အသိတဖၣ်လီၤ. ယဟိဝၤဃုထၢထီၣ် စီလူးလၢစီၤပၤ အနံၣ် ၁၀ ဝံၤအလီၢ်ခံ ဒၤဝံးဟဲအိၣ်ဖျဲၣ်ထီၣ်ဝဲလီၤ.
အကတီၢ်တုၤဒီး ယဟိဝၤစံးဘၣ်ၡမူၤအ့လးဒ်အံၤလီၤ. ‘ဟံးန့ၢ်သိလီၤဆီတနီၤဝံၤ လဲၤဆူယံးၡဲအပှၤဟံၣ်ဖိဃီဖိ လၢအအိၣ်လၢ ဝ့ၢ်ဘ့ၤသလ့ဃ့ၣ်န့ၣ်တက့ၢ်. ယဃုထၢထီၣ်အဖိခွါတဂၤ လၢကကဲစီၤပၤလံန့ၣ်လီၤ.’ ၡမူၤအ့လးတခီ ဖဲအထံၣ် ယံးၡဲအဖိခွါ အဒိၣ်ကတၢၢ်အလံအာ်အခါ ဆိကမိၣ်ဝဲဒၣ် ပှၤလၢယဟိဝၤဃုထၢအီၤန့ၣ် ကဘၣ်မ့ၢ်ပှၤအံၤလီၤ. ဘၣ်ဆၣ်သနာ်က့ ယဟိဝၤစံး, ‘ကွၢ်အဂီၤထီဆံးအါ, ဒိၣ်တၢ်ဂ့ၤဆံးအါန့ၣ်တဂ့ၤ. ယတဃုထၢအီၤလၢစီၤပၤဘၣ်.’
တုၤနုၤတစု ယံးၡဲဟဲကိးအဖိခွါအဘံနဒာ် ဒီးဒုးနဲၣ်ၡမူၤအ့လးလီၤ. ဘၣ်ဆၣ် ၡမူၤအ့လးစံးအီၤလၢ ‘ယွၤတဃုထၢအီၤစ့ၢ်ကီးဘၣ်’ လီၤ. လၢခံယံးၡဲဟဲကိးအဖိခွါ ၡးမၤကဒီးန့ၣ်လီၤ. ၡမူၤအ့လး တဲဘၣ်က့ၤဝဲယံးၡဲကဒီးလၢ ‘တမ့ၢ်ဒံးဘၣ်, ယဟိဝၤတဃုထၢအီၤစ့ၢ်ကီးဘၣ်’ န့ၣ်လီၤ. ယံးၡဲတခီဟဲကိးအဖိခွါနွံဂၤဆူၡမူၤအ့လးအအိၣ်ဘၣ်ဆၣ် ယဟိဝၤတဃုထၢ နီတဂၤဘၣ်. ၡမူၤအ့လးသံကွၢ်အီၤ, ‘နဖိခွါလၢအအိၣ်ဒီးနၤတဖၣ် တၢ်အံၤခဲလၢာ်လီၤဧါ.’ န့ၣ်လီၤ.
ယံးၡဲစံးဆၢဝဲဒၣ် ‘အိၣ်တ့ၢ်ဒံး အသဒါကတၢၢ်တဂၤလီၤ. ဘၣ်ဆၣ် အဝဲလဲၤကွၢ်သိလၢ တၢ်ပျီပူၤန့ၣ်လီၤ.’ တုၤပှၤဟဲကိးဒၤဝံးအခါ ၡမူၤအ့လးထံၣ်ဘၣ်ဝဲလၢ မ့ၢ်ပှၤအဒိၣ်တၢ်ဂ့ၤဖိန့ၣ်လီၤ. ယဟိဝၤစံးအီၤလၢ ‘မ့ၢ်အဝဲလီၤ. ဖှူလီၤသိလၢအလိၤတက့ၢ်’ ဒီးၡမူၤအ့လးစ့ၢ်ကီးမၤဝဲဒ် ယဟိဝၤစံးအီၤအသိးန့ၣ်လီၤ. ဆၢကတီၢ်လၢ ဒၤဝံးကကဲစီၤပၤလၢ ပှၤအံၣ်စရ့လးဖိတဖၣ်အဖီခိၣ်န့ၣ် ကဟဲဝဲလီၤ.
