NGA omwene diambu divangamanga vava? E kindende kiaki kikôlele mwan’ememe muna nu’a use. E use obakidi mwan’ememe kandia. Kansi e kindende kinlende, okôlele mwan’ememe muna nu’andi. Vava use kamvilukila, umbakidi muna nzevo, umvondele. Nkumbu akaka wakôla ememe vana moko ma nkosi. Nga ke nkwa unkabu ko e kindende kiaki? Nga unzeye?

Yandi i Davidi. Kuna mbanza a Beteleme kawutukila. O nkak’andi Obede, wa mwan’a Rutu ye Boaze. Nga ubasungamene? Ese dia Davidi i Yisai. O Davidi mameme ma s’andi kavungulanga. Mvu 10 miavioka tuka Yave kasolela Saulu mu kala se ntinu, i bosi kiawutuka Davidi.

Lumbu kimosi Yave ovovese Samuele vo: ‘Bonga mazi mantalu, wenda kwa Yisai wa mwisi Beteleme: kadi nsolwele ntinu muna wan’andi.’ Vava Samuele kamona Eliabe wa mwan’andi ambuta ovovele vo: ‘Kieleka, i yandi kasolele o Yave.’ Kansi, o Yave ovovese Samuele vo: ‘Kutadi ndose andi ko ngatu ntel’andi; kinsolele ko mu kala se ntinu.’

O Yisai obokele Abinadabi wa mwan’andi, untwese vana vena Samuele. Kansi o Samuele ovovele vo: ‘Ke yandi ko kasolele o Yave.’ O Yisai otwese Sama wa mwan’andi. O Samuele ovovele vo: ‘Ke yandi mpe ko kasolele o Yave.’ O Yisai otwese wan’andi nsambwadi kwa Samuele. Kansi o Yave kasolele mosi muna yau ko. O Samuele oyuvwidi Yisai vo, “o wan’aku nga bavwidi?”

O Yisai umvutwidi vo, “vasidi kak’o nsakila, mameme kevungulanga.” Vava bantwasila Davidi, o Samuele omwene vo mote kwandi. “I yandi yuyu,” u kavova o Yave. ‘Unkusa o mazi.’ I wau mpe kavanga o Samuele. E ntangwa vava ifwana o Davidi okituka se ntinu a Isaele.