KANI wabona ifilukucitika? Umusankwa apulusya iyi imbelele iyanice kuli beya. Beya alisile ne kupinta imbelele kabili alukuya mu kuilya. Pano umusankwa kafilonda ulubilo panuma, kabili kapulusya imbelele ukufuma mu kanwa kakwe beya. Kabili ili beya amwimine, umusankwa kamwikata beya ne kumwipaya! Pa mpindi imbi kapulusya imo imbelele ku nkalamu. Tali uyu musankwa musipile? Kani webo ulimwisi uyu?

Uyu ni Dafidi umwanice. Alekala mu musi wa Betelemi. Mbuya wakwe aali ni Obedi, umwana wakwe Lufi na Boasi. Kani wabanuka abo? Kabili bawisi Dafidi ni ba Jese. Dafidi alalama imbelele sya bawisi. Dafidi alifyelwe panuma ya myaka 10 ukufuma apo baYehoba basalulwile Saulu ukube’mfumu.

Impindi yafika ili baYehoba baeba Samweli ati: ‘Buula amafuta aalibelele kabili uye ku ŋanda yakwe Jese mu Betelemi. Nasalulula umo uwa bana bakwe ukube’mfumu.’ Ili Samweli abona Elyabi umwano’mwalalume umukulu uwakwe Jese, Samweli mu mutima kalabila ati: ‘Icine uyu eo baYehoba basalulula.’ Pano baYehoba bamweba’ti: ‘Wilolesya ifi ali ifumbi nefi ali ubulombe. Nsimusalulwilepo ukube’mfumu.’

Popele Jese aita Abinadabi umwana wakwe umwalalume ne kumuleta kuli Samweli. Pano Samweli alabila’ti: ‘Koku, baYehoba tabamusalulwilepo na wuyu.’ Ukukonkapo, Jese aleta Syama umwana wakwe umwalalume. Samweli alabila’ti: ‘Koku, baYehoba tabamusalulwilepo na wuyu.’ Jese aleta kuli Samweli abana bakwe basanu na babili, pano baYehoba tabasalulwilepo neli umo pali bo. Samweli aipusya ati: ‘Kani bonse aba e basankwa benu?’

Jese alabila ati: ‘Kwasyala kabinda. Pano ali mu mpanga alukwembela imbelele.’ Ili Dafidi bamuleta, Samweli abona ati musankwa uwa bulombe. BaYehoba balabila’ti: ‘Uyu niye opele. Itulula amafuta pali ye.’ Kabili ifi efi Samweli acita. Impindi ikesa ili Dafidi akabe’mfumu ya Isilaeli.

1 Samweli 17:34, 35; 16:1-13.