Chihande 57

Kalunga Mwasakula Ndavichi

WAMONO chuma chinalingiwa tahi? Kanyike nalwili mwanamukoko kuli ulusu. Ulusu ejile nakukwata mwanamukoko akalye. Oloze kanyike ayileko lumbushi nakupululula mwanamukoko kukanwa kaulusu. Kahomu akatukile ulusu, kanyike amukwachile nakumujiha! Lwola lukwavo apululwile mukoko mukwavo kundumba. Uno keshi kanyike wakuhamukako nyi? Unamwijiva tahi?

Ou kanyike ikiye Ndavichi. Atwama munganda yaMbetelema. Kaka yenyi walunga apwile Ovete, mwanaLute naMbowaze. Unavanuka ngwetu? Kaha ise yaNdavichi ikiye Yese. Ndavichi ikiye muka-kufunga mikoko jaise. Kufuma hakumusakula Saulu kuli Yehova kupwa mwangana, hahichile myaka 10 numba Ndavichi asemuke.

Jino Yehova himwamba kuli Samwele ngwenyi: ‘Mbata maji akulipwila uyenga kuzuvo yaYese muMbetelema. Ngunasakulaho mwanenyi umwe kupwa mwangana.’ Samwele hakumona mwanaYese wamukulwane, Elyave, himwalyamba ngwenyi: ‘Ou ikiye chikupu nasakula Yehova.’ Oloze Yehova ngwenyi: ‘Kanda utala hakuwaha chenyi nahakusuwa chakuzandama chenyiko. Ngunamukane kupwa mwangana.’

Kaha Yese hikusanyika mwanenyi Avinatave kumeso aSamwele. Oloze Samwele ngwenyi: ‘Nduma, chipwe ou nawa Yehova kamusakwileko.’ Kufumaho, Yese himwaneha mwanenyi Shama. Samwele ngwenyi: ‘Nduma, chipwe ou nawa Yehova kamusakwileko.’ Kuli vana venyi vamalunga Yese himwanehako vatanu navavali kuli Samwele, oloze Yehova kasakwileho umweko. Samwele himwehula ngwenyi: ‘Unwava vakivo vana uli navo kaha tahi?’

Yese ngwenyi: ‘Kuchinasale wakanyike. Oloze nayi nakufunga mikoko.’ Omu vanamunehe Ndavichi, Samwele namumono ngwenyi hikanyike wamwaza. Yehova ngwenyi: ‘You vene. Muhake maji.’ Kaha Samwele himwalinga vene ngocho. Kanda numba Ndavichi apwenga mwangana wavaIsalele.

Samwele 1, 17:34, 35; 16:1-13.