Nzambi Namutondi Davidi
MPANJI 57
Nzambi Namutondi Davidi
WUNELUKI chinamwekani? Kansi weyala namupulwishi iwu mwana kamukoku kudi bera. Bera wenjili nakukwata mwana kamukoku nawa wayileña nakumudya. Ilaña kansi weyala wamuhañili, dichi wamupulwishili mwana kamukoku kukanwa kabera. Chasutukiliyi bera, kansi weyala hakumukwata bera yomujaha nikumujaha! Hampinji yikwawu wapulwishili mukoku kudi mutupa. Iwu komana hikansi weyala womikaku? Wunamwiluki?
Diyi mukwenzi Davidi. Washakamaña mumukala waBetelemi. Nkaaka yindi wadiña Obedi, mwana kaLuti naBowazi. Wunayanuki? Tata yaDavidi diyi Jesi. Davidi wahembaña nyikoku yatata yindi. Davidi wasemukili hanyima yayaaka 10 kufuma hamutondeliwu Sawulu kwikala mwanta kudi Yehova.
Mpinji yinashikili yinamulejiwu Samweli kudi Yehova nindi: ‘Sendaku manji alema wuyi kwitala daJesi kuBetelemi. Natonda dehi mwanindi weyala wumu kwikala mwanta.’ Samweli chanamumoniyi Eliyabi wedi waJesi, hakudihoshesha nindi: ‘Mwamweni iwu diyi wunatondiyi Yehova.’ Ilaña Yehova hakumuleja nindi: ‘Bayi wumona chatalukayi nichawahayiku. Hinamutondi kwikala mwantaku.’
Dichi Jesi hakutambika mwanindi Abinadabi nakumuleta kudi Samweli. Ilaña Samweli hakuhosha nindi: ‘Nehi, Yehova hanamutondiku.’ Kulondelahu, Jesi hakuleta mwanindi Shama. Samweli hakuhosha nindi: ‘Inehi, Yehova hanamutondiku.’ Jesi hakuleta anyanindi atanu nayedi kudi Samweli, ilaña hosi niwumu anatondiwu kudi Yehova. Samweli hakumwihula nindi, ‘Awa diwu anyaneyi awamayala ejima?’
Jesi hakwakula nindi, ‘Kunashali kabinda. Ilaña nayi nakuhemba anyikoku.’ Chanamuletiwu Davidi, Samweli hakumona nindi himukwenzi walubanji. Yehova hakuhosha nindi, ‘Diyi yeniwu. Muwayishi manji.’ Nawa ichi dichaneliyi Samweli. Mpinji yikashikila yakekalayi Davidi mwanta muIsarela.
