¿NTILA, mo ntlome tiʼ ma bʼaj tzalu? Ma tzʼel tiʼn tal qʼa ẍneʼl toj ttziʼ oso. Otaq txi tiʼn oso tal rit lu tuʼn t-xi tchyoʼn. Xitzun lepeʼ tal qʼa tiʼj oso ex el tiʼn tal ẍneʼl toj ttzi. ¡Tejtzen tjaw weʼ oso, ok tpeqʼen tal qʼa ex kubʼ tbʼiyoʼn! Tuj juntl maj, el tiʼn tal qʼa juntl rit toj ttziʼ jun bʼalun. Mixtiʼ te tal qʼa tzaj xobʼ. ¿Ojtzqilaʼn tuʼne alkye tal qʼa lu?

David tbʼi qʼa lu. Atz najli toj tnam Belén. Obedtaq tbʼi tchman aju tal Rut tzaj tukʼe Boaz. ¿Naʼnxqe tuʼna? Atzun te David tbʼi ttat aju Jesé. Nxqʼuqinteq David kyiʼj t-ẍneʼl tman. Otaq tzikʼ 10 abʼqʼi toklen Saúl te ajkawil tej tul itzʼje David.

Pon ambʼil jatumel xi tqʼamaʼn Jehová te Samuel: ‹Qʼinxa jun tbʼanel aseyt ex txiʼya tja Jesé aju najle tuj Belén. Ma jaw nskʼoʼne jun tkyʼajal tuʼn tok te ajkawil›. Tej tlonte Samuel Eliab, aju tnejel tkʼwal Jesé, kubʼ t-ximan: ‹Axtok a te jlu ma jaw tskʼoʼn Jehová›. Tzajtzun tqʼmaʼn Jehová te Samuel: ‹Miʼn tzʼok tkeʼyina jniʼ twaʼlil ex aju tbʼanilxix tilbʼilal, quʼn mitiʼ ma jaw njyoʼne tuʼn tok te kawil›.

Tzajtzun ttxkoʼn Jesé Abinadab aju juntl tkyʼajal ex pon tiʼn twitz Samuel. Tmatl Samuel: ‹Ax ikx mya ate jlu ma jaw tjyoʼn Jehová›. Pon tiʼntl Jesé juntl tkʼwal Samah tbʼi. ‹Ax ikx mya te jlu ma jaw tjyoʼn Jehová›, chi Samuel. E pon tiʼn Jesé qe wuq tkyʼajal twitz Samuel, ex nijun kyxol qe jlu jaw tskʼoʼn Jehová. Xitzun tqanen Samuel: ‹¿Mintiʼpe txqantl tkyʼajala at?›

‹Oʼkx juntl tal kyitzʼen at, chi Jesé. Aju nxqʼuqin kyiʼj rit toj kojbʼil›. Tejtzen tul qʼiʼn David twitz Samuel, tbʼaneltoq tilbʼilal qʼa lu. ‹Atzun jlu›, chi Jehová te Samuel. ‹Qonkuya aseyt toj twiʼ›. Kubʼ tbʼinchen Samuel jlu. Tej tbʼet ambʼil, ok David te kawil kyibʼaj aj Israel.