Zistwar 57

Bondie Swazir David

ESKI to trouve ki finn arive? Sa garson-la inn sap sa ti mouton-la ar enn lours. Lours-la inn vini ek inn pran sa mouton-la pou al manz li. Me sa garson-la galoup deryer zot ek sap sa mouton-la depi lagel sa lours-la. Ek kan sa lours-la dres kont li, garson-la sezi li ek touy li! Enn lot fwa li ti anpes enn lion manz enn mouton. Li ena kouraz sa garson-la, pa vre? Eski to kone kisannla sa?

Se David, kan li ti ankor zenn. Li res dan lavil Bethléhem. So granper apel Obed, garson Ruth ek Boaz. Eski to rapel zot? Ek papa David apel Jessé. David vey bann mouton so papa. David ti ne di-z-an apre ki Jéhovah ti swazir Saül kouma lerwa.

Ler arive kot Jéhovah dir Samuel: ‘Pran inpe delwil spesial ek al lakaz Jessé dan Bethléhem. Mo finn swazir enn parmi so bann garson pou vinn lerwa.’ Kan Samuel trouv Jessé so pli gran garson Éliab, li dir an limem: ‘Sirman se limem ki Jéhovah inn swazir.’ Me Jéhovah dir li: ‘Pa get so oter ek so laparans. Mo pa finn swazir li kouma lerwa.’

Alor Jessé apel so garson Abinadab ek amenn li devan Samuel. Me Samuel dir: ‘Non, Jéhovah pa’nn swazir li osi.’ Apre sa, Jessé amenn so garson Shamma. Samuel dir: ‘Non, Jéhovah pa finn swazir li osi.’ Jessé amenn set parmi so bann garson devan Samuel, me Jéhovah pa swazir okenn parmi zot. Samuel demande: ‘Samem tou garson to ena?’

Jessé reponn: ‘Ena ankor enn dernie. Me li pa la, li pe vey bann mouton.’ Kan amenn David devan Samuel, Samuel trouve ki li enn zoli garson. Jéhovah dir: ‘Se limem. Vers delwil lor li.’ Ek se seki Samuel fer. Ler pou arive kan David pou vinn lerwa Israël.

1 Samuel 17:34, 35; 16:1-13.