KOTO ña̱ kéʼé ta̱ loʼo yóʼo. Xa̱ʼníra iin tí oso ña̱ va̱ʼa ni̱ka̱ku tí ndikachi loʼo sa̱na̱ra. Tí oso yóʼo ti̱inrí iin ndikachi loʼo ku̱a̱ʼa̱n xíʼinrí kaxírí. Ta xi̱ndiku̱nra sa̱tárí ta ki̱ndaara ndikachi yu̱ʼu̱rí, tá nda̱kundichirí ka̱nirarí xíʼin yu̱u̱ ta ni̱xi̱ʼi̱rí. Inka yichi̱ xa̱ʼnítura iin tí león ta ki̱ndaatura inka ndikachi yu̱ʼu̱rí. Ta̱yóʼo ndakúní-inira, ¿saá? ¿Á xíni̱ún nda̱saa naníra?

David naníra. Belén naní ñuura. Ta xi̱íra kúú ta̱ Obed, se̱ʼe ñá Rut xíʼin ta̱ Boaz. ¿Á ndákaʼún xa̱ʼa na̱yóʼo? Jesé naní yivá ta̱ David. Ta̱ David ndáara ndikachi sa̱na̱ yivára. Xa̱ku̱a̱ʼa̱n 10 ku̱i̱ya̱ kúú ta̱ Saúl rey ña̱ ñuu Israel, saáví ka̱ku ta̱ David.

Ki̱xa̱a̱ tiempo ña̱ ni̱ka̱ʼa̱n Jehová xíʼin ta̱ Samuel: ʼKiʼin aceite ta kuaʼán veʼe ta̱ Jesé ña̱ ñuu Belén. Chi yi̱ʼi̱ xa̱nda̱ka̱xíi̱n iin se̱ʼera kuu reyʼ. Tá xi̱ni ta̱ Samuel ta̱ Eliab ta̱ se̱ʼe nu̱ú ta̱ Jesé, ta nda̱kanixi̱níra: ʼTa̱yóʼo kúúvaraʼ. Soo Jehová ni̱ka̱ʼa̱nra xíʼin ta̱ Samuel: ʼVa̱ása kotoún ña̱ súkunra ni ña̱ va̱ʼa náʼa̱ra. Chi su̱ví ta̱yóʼo kuu reyʼ.

Tasaá ka̱na ta̱ Jesé se̱ʼera ta̱ naní Abinadad ta ku̱a̱ʼa̱nra xíʼinra nu̱ú ta̱ Samuel. Soo ta̱ Samuel káchira: ʼNi ta̱yóʼo kǒo níndaka̱xin Jehová ña̱ kuura reyʼ. Tándi̱ʼi, ni̱xa̱ʼa̱n ta̱ Jesé xa̱ʼa se̱ʼera ta̱ naní Samah. ʼNi ta̱yóʼo va̱ása níndaka̱xin Jehováʼ, káchi ta̱ Samuel. U̱xa̱ kúú na̱ se̱ʼe ta̱ Jesé ki̱xa̱a̱ nu̱ú ta̱ Samuel, soo nda̱a̱ ni iin na̱yóʼo kǒo níndaka̱xin Jehová ña̱ kuuna rey. ʼ¿Á na̱yóʼo kúú ndiʼi se̱ʼún?ʼ, káchi ta̱ Samuel xíʼin ta̱ Jesé.

ʼKúma̱ní ta̱ loʼo va̱ʼaka. Ndikachiva ku̱a̱ʼa̱nra kundaaraʼ, káchi ta̱ Jesé. Tá ki̱xa̱a̱ ta̱ David xíʼinna nu̱ú ta̱ Samuel, tá xi̱ni ta̱ Samuel ta̱yóʼo ta livikaví náʼa̱ra. ʼTa̱yóʼo kuu reyʼ, káchi Jehová. ʼSakáa aceite xi̱níraʼ. Ta̱ Samuel sa̱káara aceite xi̱ní ta̱ David. Ku̱a̱ʼá ku̱i̱ya̱ ni̱ya̱ʼa, saáví ni̱xa̱a̱ ta̱ David ndu̱ura rey ñuu Israel.