TLAPOUALISTLI 57

ToTajtsin Dios okipejpenki David

¿UELI tikita tlen opanok? Nin telpochtli okimakixti ichkatsin itech se oso. Oso okiuikak ichkatsin pampa kikuaskia. Maski ijkon, telpochtli omotlalo ikuitlapan, uan okimakixti ichkatsin tlen oso okinekiaya kikuas. ¡Uan ijkuak oso omoketski, telpochtli okimikti oso! Okse tonal telpochtli noijki okimakixti se ichka itech se león tlen okinekiaya kikuas. ¿Amo melauak tlen telpochtli kichiua kiteititia ye yolchikauak? ¿Te tikmati akin nin telpochtli?

Ye telpochtli David. Ye ochantiaya itech altepetl Belén. Ikojkol okatka Obed, ikone Rut uan Boaz. ¿Tikinmilnamiki? Uan itajtsin David okatka Jesé (Isaí). David okinmaluiaya ichkauan itajtsin. David oneski majtlaktli xiuitl satepan Jehová okipejpenki Saúl pampa yetoskia ken ueyi tekiua.

Oajsik tonal ijkuak Jehová okilui Samuel: ‘Xikonana chiauak tlen ajuiak uan xio ikalijtik Jesé tlen chanti Belén. Yonikpejpenki se ikone pampa yetos ken ueyi tekiua’. Ijkuak Samuel okitak Eliab, ikone Jesé akin otlayekanaya, omoilui: ‘Nin akin yokipejpenki’. Maski ijkon, Jehová okilui: ‘Amo xikita ken uejkapantik uan ken kuajkualtsin. Amo onikpejpenki pampa yetos ken ueyi tekiua’.

Ijkuakon, Jesé okinotski ikone Abinadab uan okiuikak ixpan Samuel. Maski ijkon, Samuel okijto: ‘Amo, Jehová amo okipejpenki nin’. Satepan, Jesé okiualikak ikone Samah. Uan Samuel okijto: ‘Amo, Jehová noijki amo okipejpenki nin’. Jesé okinualikak ixpan Samuel san chikome itelpolkauan, maski ijkon, Jehová amo okipejpenki nion se itech yejuan. Samuel okitlajtlani Jesé: ‘¿Yejuan nochtin mokoneuan tlen tikinpia?’.

Jesé okijto: ‘Ok kajki okse tlen xokoyotl. Oyajki okintlajpiato ichkamej’. Ijkuak okiualikilijkej David, Samuel okitak ken David okatka kuajkualtsin. Jehová okijto: ‘Nin akin yonikpejpenki. Xiktlalili chiauak ipan itsonteko’. Uan Samuel ijkon okichi. Panoskia kauitl uan David mochiuaskia ueyi tekiua itech altepetl Israel.

1 Samuel 17:34, 35; 16:1-13.