ƐNWU mɔɔ ɛzi la ɔ? Kakula ne ɛlie boane ralɛ ne ɛvi ezizile ne asa nu. Ezizile ne rahyele boane ne kɛ ɔkali. Noko kakula ne doale ye na ɔliele boane ralɛ ne ɔvile ezizile ne anloa nu. Na ezizile ne hakyile ɔ nye wɔ ɔ nwo zo la, kakula ne hyele ye na ɔbɔle ye ɔhunle ye! Mekɛ bie noko ɔliele boane ne ko ɔvile awenade nloa nu. Asoo ɔnle kakula mɔɔ lɛ akɛnrasesebɛ? Ɛze ye sonla holɛ ɔ?

Kpavolɛ Devidi ɛne. Ɔvi Bɛtelɛhɛm. Ɔ nlenya a le Obɛde, Wulutu nee Bowaze ara nrenya ne. Ɛkakye bɛ ɔ? Bɛfɛlɛ ɔ ze Gyɛsi. Devidi a nea ɔ ze mboane ne a. Gyihova kpale Sɔɔlo kɛ belemgbunli la ye ɛvolɛ 10 anzi yɛɛ bɛwole Devidi a.

Mekɛ bie dwule la Gyihova hanle hilele Samoɛle kɛ: ‘Fa nwole titile na kɔ Gyɛsi aako nu wɔ Bɛtelɛhɛm. Meye ɔ mra mrenya ne mɔ anu ko kɛ mesie ye belemgbunli.’ Mekɛ mɔɔ Samoɛle nwunle Gyɛsi ara nrenya Yilayabe la, ɔhanle ye ɔ ti akunlu kɛ: ‘Nɔhalɛ, ɛhye yɛɛ Gyihova ɛkpa nu ɛye ye a.’ Noko Gyihova zele ye kɛ: ‘Mmanea ye anyinlima ne anwo anzɛɛ kɛzi ɔ anwo yɛ fɛ la. Tɛ ye mɔɔ yɛɛ meye ye kɛ belemgbunli a.’

Ɔti Gyɛsi vɛlɛle ɔ ra Abenadabe manle Samoɛle nleanle ye. Noko Samoɛle hanle kɛ: ‘Kyɛkyɛ, tɛ ɛhye noko a Gyihova ɛkpa ye a.’ Eza Gyɛsi vɛlɛle ɔ ra Hyama manle ɔrale. Na Samoɛle zele ye kɛ: ‘Kyɛkyɛ, Gyihova ɛmkpondɛ ɛhye noko.’ Gyɛsi manle ɔ mra nsuu ne mɔ amuala rale Samoɛle anyunlu, na Gyihova anye bɛ nuhua biala. Samoɛle bizale kɛ: ‘Na ɛ mra ne mɔ, bɛ muala ɛhye ɔ?’

Gyɛsi buale kɛ: ‘Yeha me awolɛ kazima ne. Na yehɔ ɔkanlea mboane ne mɔ.’ Mekɛ mɔɔ bɛ nee Devidi rale la Samoɛle nwunle kɛ ɔle kakula kɛnlɛma. Gyihova zele kɛ: ‘Ɛhye a mekpa nu meye a; fa nwole ne kpokpa ye.’ Zɔhane ala yɛɛ Samoɛle yɛle a. Mekɛ bie bara mɔɔ Devidi bayɛ Yizilayɛ belemgbunli a.