BO POR mira kiko a sosodé? E mucha hòmber a skapa e lamchi for di e oso. E oso a bini i a kohe e lamchi bai kuné pa kom’é. Pero e mucha a kore tras di e oso i a skapa e lamchi for di su boka. I ora e oso a lanta para, e mucha a gara e oso i a dal e mata! Un otro biaha el a skapa un karné for di un leon. E ta un mucha ku hopi kurashi, bo no ta haña? Bo sa ken e ta?

Esei ta e hóben David. E ta biba den e pueblo di Bètlehèm. Su tawela tabata Obed, yu di Ruth ku Boaz. Bo ta kòrda nan? I tata di David ta Isaí. David ta kuida e karnénan di su tata. David a nase 10 aña despues ku Yehova a skohe Saul pa ser rei.

E tempu a yega ora ku Yehova a bisa Samuel: ‘Kohe un tiki zeta spesial i bai na kas di Isaí na Bètlehèm. Mi a skohe un yu di dje pa ser rei.’ Ora Samuel a mira Eliab, e yu mayó di Isaí, el a pensa: ‘Esei siguramente ta esun ku Yehova a skohe.’ Pero Yehova a bis’é: ‘No wak kon haltu i nèchi e ta. Mi no a skoh’é pa ser rei.’

P’esei Isaí a yama su yu Abinadab i a hib’é serka Samuel. Pero Samuel a bisa: ‘Nò, Yehova no a skoh’é tampoko.’ Siguientemente, Isaí a trese su yu Sama. Samuel a bisa: ‘Nò, Yehova no a skoh’é tampoko.’ Isaí a trese shete di su yu hòmbernan serka Samuel, pero Yehova no a skohe ningun di nan. Samuel a puntra: ‘Esei ta tur e yu hòmbernan?’

Isaí a bisa: ‘Tin e yu mas chikí ainda. Pero e ta pafó ta kuida e karnénan.’ Ora nan a trese David paden, Samuel a mira ku e tabata un bunita mucha. Yehova a bisa: ‘Esaki ta esun. Basha zeta riba dje.’ I esei ta loke Samuel a hasi. Ku tempu, David lo a bira rei di Israel.

1 Samuel 17:34, 35; 16:1-13.