CHAWILAMPEʼ su tijan kbʼan pa ri wachbʼäl. Ri ala xresaj ri alaj chij che ri jun oso. Ri jun oso xukʼam bʼi ri alaj chij rech kutijo. Tekʼuriʼ ri ala xutarnej, tekʼuriʼ xresaj ri alaj chij pa uchiʼ ri jun oso. ¡Chiʼ ri jun oso xwalajik, ri ala xukamsaj wajun oso! Pa jun chik qʼij ri ala xresaj jun chij pa uqʼabʼ jun köj. Su kabʼij at che wajun ala che xubʼan wariʼ ¿La xa kuxibʼij ta ribʼ? ¿La awetaʼm at jachin laʼ wajun ala?

Are ri ala ubʼiʼ David. Ri rachoch kʼo pa ri tinamit ubʼiʼ Belén. Ri umam ubʼiʼ Obed, Obed kalkʼwal ri Rut rukʼ Boaz. ¿La xpe na pa ajolom? Jesé ubʼiʼ ri utat ri David. David keʼuchajej ri täq uchij ri utat. Qʼaxnäq chi 10 junabʼ chiʼ Jehová xuchaʼ ri Saúl rech kubʼan ajawinel, tekʼuriʼ xalax David.

Xopan ri qʼij chiʼ Jehová xubʼij wariʼ che Samuel: ‹Chakʼama bʼi jun loqʼalaj aceite tekʼuriʼ jat pa rachoch Jesé kʼo Belén. Xinchaʼ jun chike ri ukʼojol rech kubʼan ajawinel›. Chiʼ Samuel xril ri Eliab, ri nabʼeʼal ukʼojol Jesé, xubʼij wariʼ: ‹Qastzij che are laʼ›. Tekʼuriʼ Jehová xubʼij che: ‹Xaq mawil ri unimal raqan xuqujeʼ che xa jun jeʼlikalaj (tzʼoʼylaj) achi. Are ta xinchaʼo rech kubʼan ajawinel›.

Rumal laʼ Jesé xusikʼij ri ukʼojol ubʼiʼ Abinadab tekʼuriʼ xukʼam lo chuwäch Samuel. Tekʼuriʼ xubʼij wariʼ: ‹Jehová are täj xuchaʼo›, xchaʼ. Tekʼuriʼ, Jesé xukʼam lo ri jun chik ubʼiʼ Sama. ‹Jehová are täj xuchaʼo›, xchaʼ ri Samuel. Jesé xukʼam lo wuqubʼ chike ri ukʼojol chuwäch Samuel, tekʼuriʼ Jehová nijun xuchaʼo. ‹¿La e are waʼ konojel ri akʼojol?› Xchaʼ Samuel.

‹Kʼo na ri alaj chike.› Are tijan kuchajej ri täq chij, xchaʼ Jesé. Chiʼ xkʼam lo ri David, Samuel xrilo che David jun jeʼlikalaj ala. ‹Are waʼ›, xchaʼ Jehová. ‹Chaya ri aceite pa ujolom.› Are laʼ xubʼan ri Samuel. Kqʼax kʼu na ri junabʼ, David kubʼan na ajawinel rech Israel.