¿QAWACHKANKICHU kay dibujopi pasasqanta? Kay mozoqa chitachanta ukumarimanta qechurun. Ukumarim chitata mikukunanpaq apakurqa. Hinaptinmi mozoqa qepanta qatispa ukumaripa siminmanta chitanta qechuramun. ¡Ukumari kutiriykuptinmi mozoqa maqachkaspallam wañurachin! Huk kutipipas mozoqa leonmanta ovejanta qechurqa. ¿Manachu kaykuna ruraq mozoqa qarinchakuq kanman? ¿Yachankichu pitaq kay mozoqa kanman?

Payqa David sutiyoqmi. Hinaspa Belen llaqtapim yachan. Rutwan Boozpa churin Obedpa willkanmi karqa. ¿Yuyachkankichu paykunamanta? Isai sutiyoq runam Davidpa taytanqa karqa. Payñataqmi taytanpa ovejankunata michirqa. Saulta rey kananpaq Jehová Dios akllasqanmanta 10 wata qepatam Davidqa nacerqa.

Tiempopa risqanman hinam Jehová Diosqa Samuelta nirqa: ‘Botellaykiman aceiteta huntachispayki Belen llaqtapi Isai sutiyoq runapa wasinman riy. Paypa huknin churintam akllaruniña rey kananpaq’ nispa. Chaymi Samuelqa qawarqa Isaipa churin Eliabta hinaspam piensarqa: ‘Segurom kay qaripuni kachkan’ nispa. Ichaqa Jehová Diosmi Samuelta nirqa: ‘Amayá allin rikchaynillantachu qawayqa nitaq sayaynillantachu. Paytaqa manam munanichu’ nispa.

Chaymanta, Isaiqa qayarqa Abinadab sutiyoq huknin churintaña hinaspam asuykachirqa Samuelman. Payñataqmi nirqa: ‘Manam paychu Jehová Diospa akllasqanqa’ nispa. Chaymantam Isaiqa asuykachirqa Sama sutiyoq churinta. Hinaptinmi Samuel nirqa: ‘Manam paychu Jehová Diospa akllasqanqa’ nispa. Isaimá asuykachirqa qanchis churinkunata Samuelman, Jehová Diosmi ichaqa mana mayqannintapas akllarqachu. ‘¿Kayllachu churikikuna?’ nispam Samuelqa Isaita tapurqa.

‘Kachkanraqmi sullka kaq, payqa oveja michiqmi’ nispam Isaiqa nirqa. Davidta qayaramuptinku Samuel qawaykuptinmi warmaqa sumaq rikchayniyoq buenmozom kasqa. Hinaptinmi Jehová Diosqa nirqa: ‘Paymi, chaynaqa aceitewan tallispayá nombray rey kananpaq’ nispa. Chaynatamá Samuelqa rurarqa. Chaymantañam Davidqa Israel runakunapa reynin kanqa.