TE KITE ra koe e eaa tei tupu? Kua akaora te tamaiti i teia punua mamoe mei te pea. Kua aere mai te pea, kua apai i te punua mamoe e te aere ra ka kai i te reira. Inara kua arumaki atu te tamaiti ia raua, e kua akaora i te punua mamoe mei roto i te vaa o te pea. E i te tu anga mai te pea ki runga, kua opuia atu aia e te tamaiti e kua ta i te reira kia mate! I tetai taime ke mai kua akaora aia i tetai mamoe mei te riona. E tamaiti toa tikai aia me kare ainei? Kua kite koe e koai aia?

Ko te mapu teia ko Davida. E noo ana aia ki roto i te oire o Betelehema. Ko Obeda tona papa ruau, te tamaiti a Ruta raua ko Boaza. Te maara ra ia koe raua? E ko te papa o Davida ko Iese. E tiaki ana a Davida i te mamoe a tona papa. Anauia a Davida e 10 mataiti i muri ake i te iki anga a Iehova ia Saula ei ariki.

Kua tae te taime no Iehova i te tuatua atu kia Samuela e: ‘Apai koe i tetai manongi puapinga e e aere ki te are o Iese i Betelehema. Kua iki au i tetai o tana tamaiti ei ariki.’ I te kite anga a Samuela i te tamaiti mua a Iese ko Eliaba, kua karanga aia kiaia uaorai e: ‘Papu e ko teia ta Iehova i iki.’ Tera ra akakite a Iehova kiaia e: ‘Eiaa e akara i tona tu teitei e tona mata manea. Kare au i iki iaia ei ariki.’

No reira kua kapiki a Iese i tana tamaiti ko Abinadaba e kua apai mai iaia kia Samuela. Inara, karanga a Samuela e: ‘Kare, kare katoa a Iehova i iki iaia.’ Aru mai, kua apai mai a Iese i tana tamaiti ko Sama. ‘Kare, kare katoa a Iehova i iki iaia,’ i karanga ai a Samuela. Kua apai mai a Iese e itu o tana tamariki tamaroa kia Samuela, inara kare a Iehova i iki ana i tetai ia ratou. ‘Ko teia ua ainei te au tamariki tamaroa?’ i ui ei a Samuela.

‘Te vai ra rai te tamaiti openga,’ i na Iese ei. ‘Tera ra te tiaki ra aia i te mamoe.’ I te apaiia mai anga a Davida, kua kite a Samuela e e tamaiti mata manea tikai aia. ‘Teia aia,’ i karanga ai a Iehova. ‘E riringi koe i te manongi ki runga iaia.’ E ko teia ta Samuela i rave. Te vai nei te tuatau ka riro mai a Davida ei ariki no Iseraela.