KODI musaona kuti ndi ninji cidacitika? Mphale apulumusa mwanabira uyu kwa khandwe. Khandwe abwera kakwata mwanabira na akhaenda kamudya. Mbwenye mphale apithamangira, mbapulumusa mwanabira pa mulomo pa khandwe. Mudalamuka khandwe, mphale amphata mbammenyera pantsi mbafa! M’nzidzi unango iye apulumusa ibodzi ya mabira kwa nkhalamu. Kodi si mphale wacipapo tayu? Kodi musadziwa kuti iye mbani?

Ndi mphale Davidi. Akakhala m’nzinda wa Betelehemu. Mbuyace akhali Obedi, mwana wamamuna wa Rute na Bowazi. Kodi musaakumbuka? Na baba wa Davidi ndi Jese. Davidi akhatsalakana mabira a babace. Davidi abalwa piaka 10 Yahova mbadamala kusankhula kale Sauli kuti akhale mambo.

Wafika nzidzi udapanga Yahova Samueli: ‘Kwata mafuta akupambulika uende kunyumba ya Jese ku Betelehemu. Ndasankhula mbodzi wa anace kuti akhale mambo.’ Mudaona Samueli mwana wankulu wa Jese, Eliabi, alonga kwa iye ene: ‘Mwandimomwene uyu ndiye adasankhula Yahova.’ Mbwenye Yahova ampanga: ‘Leka yang’ana cimo na kubalika kwace tayu. Sidansankhula kuti akhale mambo tayu.’

Natenepa Jese acemera mwanace Abinadabi mbaenda naye kuna Samueli. Mbwenye Samueli alonga: ‘Nkhabe, Yahova adansankhulambo tayu.’ Buluka penepo, Jese abweresa mwanace Sama. Samueli alonga: ‘Nkhabe, Yahova adansankhulambo tayu.’ Jese abweresa ana ace anomwe kuna Samueli, mbwenye Yahova hadasankhula nee mbodzi ene wa iwo. Samueli abvunza: ‘Kodi aphale onsene ndi awa?’

Jese alonga: ‘Alipo wang’ono kakamwe. Mbwenye iye abulukapo, akutsalakana mabira.’ Mukapitiswa Davidi, Samueli aona kuti iye ndi mphale wakubalika. Yahova alonga: ‘Ndi unoyu. Nkhutulire mafuta.’ Na Samueli acita pyenepi. Unadzafika nzidzi wakuti Davidi anadzakhala mambo wa Israyeli.