YU E si san pasa dyaso? A boi puru a pikin skapu na a mofo fu a beer. A beer ben kisi a pikin skapu èn ben o nyan en. Ma a boi ben lon na a beer baka èn ben puru a pikin skapu na en mofo. Di a beer opo tanapu na tapu en bakafutu, dan a boi grabu a beer hori èn naki en kiri. Wan tra leisi a ben puru wan skapu na a mofo fu wan lew. Na wan deki-ati boi, a no so? Yu sabi suma na en?

A de a yonkuman David. A e libi na a foto Betlehem. En granpapa ben de Obed, a manpikin fu Rut nanga Boas. Yu sabi den ete? David papa na Isai. David e luku den skapu fu en papa. David mama meki en tin yari baka di Yehovah ben teki Saul fu de kownu.

Wan dei Yehovah e taigi Samuel: ’Teki pikin spesrutu oli èn go na a oso fu Isai na Betlehem. Mi teki wan fu en manpikin fu de kownu.’ Te Samuel e si Eliab, a moro bigi manpikin fu Isai, a e taki na ensrefi: ’Disi de seiker a wan di Yehovah teki.’ Ma Yehovah e taigi en: ’No luku a langa di a langa èn a moi di a moi. Mi no teki en fu de kownu.’

Dan Isai e kari en manpikin Abinadab èn a e tyari en go na Samuel. Samuel e taki: ’Nôno, Yehovah no teki en tu.’ Dan Isai e tyari en manpikin Sama kon. ’Nôno, en tu Yehovah no teki’, Samuel e taki. Isai e tyari seibi fu en manpikin kon na Samuel, ma Yehovah no e teki nowan fu den. ’Disi na ala den boi di yu abi?’ Samuel e aksi.

’A moro yonguwan de ete’, Isai e taki, ’ma a gowe go luku den skapu.’ Te den e tyari David kon na inisei, dan Samuel e si taki a de wan moi boi. ’Disi na a wan’, Yehovah e taki. ’Kanti na oli na tapu en ede.’ Èn na dati Samuel e du. A ten o doro te David sa tron kownu fu Israel.