UYABONA yini kutsi kwentekeni lana? Lomfana usindzise lelizinyane lemvu kulelibhele. Lelibhele lifike labamba lelizinyane ngematinyo lifuna kulidla. Kodvwa lomfana waligijimisa, futsi wasindzisa lelizinyane emlonyeni walelibhele. Litsite nalitsi liyaphakama, lomfana walibamba walishaya laze lafa. Ngalesinye sikhatsi wasindzisa lenye imvu ebhubesini. Uyabona yini kutsi lomfana unesibindzi? Uyamati yini kutsi ngubani ligama lakhe?

Lomfana ligama lakhe nguDavide, futsi uhlala edolobheni lase Bhetlehema. Mkhulu wakhe kwakungu-Obedi, labeyindvodzana yaRuthe naBowazi. Usabakhumbula yini? Babe wakhe kwakunguJese. Davide abenakekela timvu tababe wakhe. Watalwa sekwendlule iminyaka lengu-10 Jehova akhetse Sawula kutsi abe yinkhosi.

Kwefika sikhatsi lapho Jehova atsi kuSamuweli: ‘Tsatsa emafutsa lakhetsekile uhambe uye endlini yaJese eBhetlehema, ngobe ngikhetse lenye yemadvodzana akhe kutsi ibe yinkhosi.’ Samuweli watsi nakabona indvodzana yaJese lendzala Eliyabe, watsi: ‘Impela lona nguye lokhetfwe nguJehova.’ Kodvwa Jehova watsi kuye: ‘Ungabuki kubukeka nebudze bakhe, ngoba yena angikamkhetsi kutsi abeyinkhosi.’

Ngako Jese wabita indvodzana yakhe Abinadabi wamletsa kuSamuweli. Kodvwa Samuweli watsi: ‘Cha, Jehova akakamkhetsi nalona.’ Jese wabese uletsa indvodzana yakhe Shama. Samuweli watsi: ‘Nalona Jehova akakamkhetsi.’ Waphindze waletsa emandvodzana akhe lasikhombisa kuSamuweli, kodvwa Jehova akazange akhetse naleyodvwa kuwo. Samuweli wabuta Jese watsi: ‘Ngulawa kuphela yini emadvodzana akho?’

Jese watsi: ‘Ukhona lomncane kunabo bonkhe, kodvwa akekho uye kuyekwelusa timvu.’ Ngalesikhatsi Davide aletfwa, Samuweli wambona kutsi ungumfana lomuhle. Jehova watsi: ‘Nguye lona, tsela lamafutsa kuye.’ Samuweli wakwenta loko. Besitawufika sikhatsi lapho Davide abetawuba yinkhosi yaka-Israyeli.