IPEDORI ijo aanyun nu atakanutu? Ayua esapat imerekek yen kanejai adubu. Abu adubu kokopo imerekek ido alosi anyamar. Konye abu esapat koker atupakin kes kosodi ayuun imerekek kakituk naka adubu. Ido ne adakunor adubu, kikam esapat nesi, kinomak kwap, koyar! Adiope pak, abu ngesi koyua adiopet kamerekekin kanejai engatuny. Mam kereka lo erai esapat loetiting? Ijeni ijo, ingai bo ngesi?

Erai ngesi atumunan loenyaritai Daudi. Iboie nges kore Betelekem. Papaake ngesi Obed, okoku loka Rusi ka Boas. Iitunit ijo kes? Ido papa loka Daudi ngesi Yese. Ecokienenei Daudi amerekekin nuka papake. Eurunitai Daudi ikar 10 akaulo na adauna Yawe aseun Saul kwape ekabaka.

Abu apak odolu na atemaria Yawe Samuel ebe: ‘Kolem akinyet naitegelikina ido kolot togo loka Yese ko Betelekem. Adau aseun ediopet kosapake araun ekabaka.’ Keanyu Samuel Eliab okoku lokapolon loka Yese, kotema kotauke atiar: ‘Abeit lo cut ngesi eseunit Yawe.’ Konye, kotema Yawe ngesi atiar: ‘Siri kite aojauke karaida aibuses ke. Mam eong aseunit ngesi araun ekabaka.’

Aso konyarau Yese okokuke lo anyaritai Abinadab, koyangau ne ajai Samuel. Konye kotema Samuel ebe: ‘Mam Yawe eseunit loda.’ Koyangau bobo Yese okokuke lo anyaritai Sama. Kotema Samuel ebe, ‘mam Yawe eseunit loda.’ Koyangau Yese isapake ikanyarei kere nejai Samuel, konye mam Yawe abu koseu idiopet kakesi. Kingit Samuel: ‘Lu kesi isapakon kere?’

Kotema Yese ebe: ‘Esalit ingorit, ido ejai icokie amerekekin.’ Keyangaun Daudi, Koany Samuel ebe, erai esapat lo ajok asesen. Kotema Yawe ebe: ‘Ngesi lo. Kinyonyoik nges akinyet.’ Ido nu ngesi abu Samuel kiswama. Edoluni apak na erauna Daudi ekabaka loka Isirael.