КӨРЕМ, мында чүү болган-дыр? Бичии оол чаш хураганны адыгдан камгалап алган. Адыг келгеш, хураганны аппаргаш, чиир деп турган. Ынчалза-даа оол ооң соондан сүргеш, хураганны адыгның аксындан камгалап алган. Адыг бут кырынга туруп аарга, оол адыгны сегирип алгаш, өлүрүп каапкан! А бир катап ол хойну арзылаңдан камгалап алган. Кандыг кончуг дидим оол боор, ындыг-дыр бе? Кымыл ол, билир сен бе?

Ол дээрге элээди оол Дави́д-тир. Ол Вифлее́м хоорайда чурттап турар. Ооң кырган-ачазын Овид дээр, ол Руфь биле Воозтуң оглу. Олар кымнар ийик, сактыр-дыр сен бе? А ооң адазы — Иессе́й. Дави́д ачазының хойларын кадарып турар. Иегова Сау́лду хаан кылдыр шилип алган соонда, Дави́д 10 чыл болгаш төрүттүнүп келген.

Үези кээрге, Иегова Самуи́лге дужааган: ‘Онзагай үстен алгаш, Вифлее́мче, Иессе́йниң бажыңынче бар. Ооң оолдарының бирээзин хаан кылдыр шилип алдым’. Самуи́л Иессе́йниң улуг оглун Елиавты көргеш, иштинде боданган: ‘Иегова ону шилип алган боор’. Ынчалза-даа Иегова чугаалаан: ‘Ооң узунунче болгаш чаражынче көрбе. Мен ону хаан кылдыр шиливедим’.

Ынчаарга Иессе́й оглу Аминадавты кый дээш, Самуи́лге эккелген. Ынчалза-даа Самуи́л мынча дээн: ‘Чок, ону Иегова база-ла шиливээн’. Иессе́й оглу Самманы эккелген. ‘Чок, ону база-ла Иегова шиливээн’,— деп, Самуи́л чугаалаан. Иессе́й ээлчег аайы-биле Самуи́лге чеди оглун эккелген, ынчалза-даа оларның чаңгызын-даа Иегова шиливээн болган. ‘Бо дээрге оолдарың шуптузу бе?’— деп, Самуи́л айтырган.

— База бирээзи бар — эң хеймери,— деп, Иессе́й чугаалаан.— Ынчалза-даа ол ам чок — хой кадарып турар.— Самуи́лге хевири чараш элээди оолду эккелген — ону Дави́д дээр. ‘Ол-дур,— деп, Иегова айыткан.— Үстү ооң бажынче кудувут’. Самуи́л шак ынчаар кылган. Ынчалза-даа Дави́д Изра́ильдиң хааны апаарының мурнунда элээн үе эртер.