OVE hẽ o lete eci ci kasi oku pita ndeti palo? Umalẽhe u ndeti wa popela okameme peka lio kanyani. O kanyani ka kuata okamõla komeme oco a ka lie. Pole umalẽhe wa lupukilako kuenje wa yovola okameme kaco komẽla wayo. Noke wa tola pokati o kanyani kaco kuenje wa ka ponda. Kepuluvi likuavo eye wa yovola omeme peka liohosi. Anga hẽ ku tava okuti umalẽhe u wa kuatele utõi wocili? Ove hẽ wa kũlĩha onduko yaye?

Umalẽhe waco onduko yaye Daviti. Eye wa kala ko Beteleme. Sekulu yaye, Ovede omõla a Ruti una a cita la Boasi. Ove hẽ ivaluka omanu vaco? Isia ya Daviti, Jese. Daviti wa enda loku lisa olomeme via isiaye. Eye wa citiwa eci papita ekũi lianyamo tunde eci Yehova a nõla Saulu oku linga osoma.

Eci papita otembo yimue, Yehova wa sapuila Samuele hati: ‘Tikula ulela, kuende konjo ya Jese u Beteleme. Pokati komãla vaye valume opo nda nõla umue oka kala osoma.’ Eci Samuele a mola Eliava omõla a Jese, wa popia lutima waye hati: ‘U eye Yehova a nõla.’ Pole Yehova wo sapuila hati: ‘Ku ka vanje keposo liocipala caye pamue koku lepa kutunga waye. U ndeti haeyeko nda nõla oku linga osoma.’

Omo liaco, Jese wa vilikiya omõlaye Avinadava kuenje wo tuala ku Samuele. Pole Samuele wa popia hati: ‘Ndaño yu, Yehova haeyeko a nõla.’ Noke, Jese wa vilikiya Siama kuenje wo tuala ku Samuele. Samuele wa popia laye hati: ‘Sio, u ndeti haeyeko Yehova a nõla.’ Jese wa tuala omãla vaye valume epanduvali kovaso a Samuele pole Yehova ka nõlelepo layumue. Oco Samuele wa pula hati: ‘Omãla vove valume vosi va suapo?’

Jese wa kumbulula hati: ‘Kuasiala lika kuasula. Pole o kasi loku lisa olomeme.’ Eci Daviti a pitila, Samuele wa limbuka okuti wa posoka calua. Noke Samuele wa popia hati: ‘U eye Yehova a ndi sapuila oku waveka ulela kokuaye.’ Eci papita otembo yimue, Daviti weya oku linga osoma ya va Isareli.

1 Samuele 17:34, 35; 16:1-13.