Ni a vhona uri ho itea mini? Mutukana o tshidza ngwana iyi kha tshivhingwi. Tshivhingwi tsho ḓa tsha dzhia ngwana nahone tsho vha tshi tshi khou ya u i ḽa. Fhedzi mutukana a zwi pandamedza, a tshidza ngwana mulomoni wa tshivhingwi. Musi tshivhingwi tshi tshi vuwa, mutukana a tshi fara a tshi rwa tsha fa! Tshiṅwe tshifhinga o tshidza iṅwe ya dzinngu kha ndau. Naa a si mutukana a sa ofhi? Ni a ḓivha uri ndi nnyi?

Uyu ndi Davida. O vha a tshi dzula muḓini wa Betlehema. Makhulu wawe o vha e Obede, murwa wa Ruthe na Boasi. Ni a vha humbula? Khotsi a Davida o vha e Isai. Davida o vha a tshi lisa nngu dza khotsi awe. Davida o bebwa nga murahu ha miṅwaha ya 10 Yehova o no nanga Saulo u vha khosi.

Ha ḓa tshifhinga tsha musi Yehova a tshi ri kha Samuele: ‘Dzhia mapfura o khetheaho u ye nḓuni ya Isai Betlehema. Ndo nanga muṅwe wa vharwa vhawe u vha khosi.’ Musi Samuele a tshi vhona Eliaba murwa muhulwane wa Isai, a ri kha ene muṋe: ‘Vhukuma hoyu ndi ene we Yehova a mu nanga.’ Fhedzi Yehova a ri: ‘U songo sedza uri o lapfa na u naka hani. Tho ngo mu nanga.’

Ngauralo Isai a vhidza murwa wawe Abinadaba a mu ḓisa ha Samuele. Fhedzi Samuele a ri: ‘Hai, Yehova ho ngo mu nanga na ene.’ Isai a dovha a ḓisa murwa wawe Sama. Samuele a ri: ‘Hai, Yehova ho ngo mu nanga na ene.’ Isai a ḓisa vharwa vhawe vha sumbe kha Samuele, fhedzi Yehova a si nange muṅwe wavho. Samuele a vhudzisa: Àvha vhatukana vho fhelela?’

Isai a ri: ‘Hu kha ḓi vha na muṱuku kha vhoṱhe. Fhedzi u khou lisa nngu.’ Musi Davida a tshi ḓiswa, Samuele a zwi vhona uri ndi mutukana wavhuḓi. Yehova a ri: ‘Ndi onoyu. Shela mapfura khae.’ Samuele a ita ngauralo. Ho vha hu tshi ḓo ḓa tshifhinga tsha musi Davida a tshi ḓo vha khosi ya Isiraele.

1 Samuele 17:34, 35; 16:1-13.