NAKIKITA mo ba an nahitabo? Gintalwas hini nga batan-on an nati nga karnero tikang ha oso. Inabot ini nga oso, ngan gintabag an karnero. Kakaunon na unta hito an karnero, kondi ginlanat ito han batan-on, ngan gin-agaw an karnero tikang ha baba han oso. Han umatake an oso, ginkaptan niya ito ngan ginpatay! Ha lain nga higayon, iya gintalwas an usa nga karnero tikang ha leon. Maisog hiya nga batan-on, diri ba? Kilala mo ba hiya?

Hiya hi David. Naukoy hiya ha bungto han Betlehem. An iya lolo amo hi Obed nga anak nira Rut ngan Boas. Nahinunumdoman mo ba hira? Hi Jesse an tatay ni David. Hi David an nagmamangno han kakarnerohan han iya tatay. Natawo hiya paglabay hin 10 ka tuig katapos pilion ni Jehova hi Saul nga magin hadi.

Inabot an panahon nga hi Jehova nagsiring kan Samuel: ‘Pagkuha hin espesyal nga lana ngan kadto ha balay ni Jesse ha Betlehem. Ginpili ko an usa han iya mga anak nga magin hadi.’ Han nakita ni Samuel an suhag ni Jesse nga hi Eliab, nagsiring hiya ha iya kalugaringon: ‘Sigurado nga ini an ginpili ni Jehova.’ Kondi ginsidngan hiya ni Jehova: ‘Ayaw kitaa an iya kahitaas ngan kagwapo. Diri hiya an akon ginpili nga magin hadi.’

Salit gintawag ni Jesse an iya anak nga hi Abinadab ngan ginpakadto hiya kan Samuel. Kondi hi Samuel nagsiring: ‘Diri hiya an pinili ni Jehova.’ Sunod, ginpagawas ni Jesse an iya anak nga hi Sama. ‘Diri, diri hiya an pinili ni Jehova,’ siring ni Samuel. Ginpakadto ni Jesse an iya pito nga anak kan Samuel, kondi waray bisan usa ha ira an ginpili ni Jehova. ‘Ini la ba an imo mga anak nga lalaki?’ nagpakiana hi Samuel.

‘May-ada pa, an putó,’ siring ni Jesse. ‘Kondi aadto hiya ha gawas, nagmamangno han kakarnerohan.’ Han ginpasulod hi David, nakita ni Samuel nga gwapo hiya nga batan-on. ‘Amo ini hiya,’ siring ni Jehova. ‘Dihugi hiya hin lana.’ Ngan ito an ginbuhat ni Samuel. Maabot an panahon nga hi David magigin hadi ha Israel.