ANA akuyiwona yayitendekweyo? Mcandajo akulupwisye kamwanace kangandoloko kukamwa kwa cimbalangondoco. Cimbalangondo cayice kukukwakula kangondolo kuti cilye. Nambo mcandajo akucitopola, ni kukakulupusya kamwanace ka ngondolo kakaliji kukamwa kwa cimbalangondoco. Sambano cimbalangondoco pacikumsenyela, mcandajo akucikamula ni kuciputa mpaka kuwa! Pandaŵi jinesoni ŵakulupwisye ngondolo ku lisimba. Ana jweleju ngaŵa mcanda jwakulimba mtima? Ana akummanyilila kuti ali nduni?

Mcandaju lina lyakwe Daudi. Akusatama mu msinda wa Betelehemu. Angangagwe ŵaliji Obedi, mwanace jwa Lute ni Bowasi. Ana akwakumbucila jemanjaji? Atatigwe Daudi ali Jese. Daudi ŵacingaga ngondolo sya Atati ŵakwe. Daudi ŵapagwile pali papite yaka 10 Yehofa cimsagulile Sauli kuŵa mwenye.

Jakwanile ndaŵi jele Yehofa ŵamsalile Samuyele kuti: ‘Mjigale mawuta gapajika ni mjawule kunyumba ja Jese ku Betelehemu. Une sagwile jumo jwa ŵanace ŵakwe kuŵa mwenye.’ Samuyele pakum’wona Eliyabu mwanace jwamkulungwa jwa Jese, jwalakwe akuŵeceta jika kuti: ‘Mwangakayicila aju ali jwele Yehofa jwamsagwile.’ Nambo Yehofa akumsalila kuti: ‘Mkasimlola ulewu kapena kusalala kwa mundu. Une nganinamsagula jwelejo kuŵa mwenye.’

Sambano Jese akum’ŵilanga Aminadabu jwalisoni mwanagwe nikwawula najo kwa Samuyele. Nambo Samuyele akuŵeceta kuti: ‘Iyayi, ajusoni Yehofa nganamsagula.’ Kaneko Jese akwika najo Shama mwanagwe jwine. Samuyele akuŵecetasoni kuti: ‘Iyayi, ajusoni Yehofa nganamsagula.’ Jese akwisa ni ŵanace ŵakwe ŵane ŵakwana msano ni ŵaŵili kwa Samuyele, nambo Yehofa pangali jwakumsagula. Samuyele akuwusya kuti: ‘Ana acanda wosope ni ŵeleŵa?’

Jese akwanga kuti, ‘apalisoni jwine jwamnandi, nambo apite kukulisya ngondolo.’ Pakwika Daudi, Samuyele akum’wona kuti ali mcanda jwakusalala. Yehofa akuŵeceta kuti: ‘Mundu jula ni jweleju. Mumtaje mauta pamtwe pakwe.’ Samuyele akutenda yeleyi. Ndaŵi jiciyika jakuti Daudi caciŵa mwenye jwa Ayisalayeli.