Dios ribí David
Historia 57
Dios ribí David
ÑEE zanda gúʼyaluʼ xi maʼ guca la? Hombrehuiiniʼ ca bilabe dendxuhuiiniʼ riʼ de oso ca. Oso ca yeneme dendxuhuiiniʼ riʼ para gome laa, peru hombrehuiiniʼ ca yenanda laame ne bilabe dendxuhuiiniʼ riʼ de ruaa oso ca. ¡Ne ora biasa oso que la? hombrehuiiniʼ ca bininá laame ne biiti laame! Sti dxi, hombrehuiiniʼ ca laaca bilá ti dendxuhuiiniʼ de ruaa ti lión. Cadi raʼbuʼ nadxibalú hombrehuiiniʼ ni biʼniʼ ca ndiʼ la? Nannuʼ tu hombrehuiiniʼ riʼ la?
Hombrehuiiniʼ riʼ nga David, laabe nabézabe ti guidxi láʼ Belén. Bixhozebídabe nga Obed, xiiñiʼ Rut ne Booz. Rietenalaʼdxuʼ laacabe la? Ne bixhoze David nga Isaí (Jesé), ne laabe nga rápabe dendxuʼ stiʼ bixhózebe. Gudiʼdiʼ si chii iza de gulí Jiobá Saúl para gaca rey la? beeda gale David.
Bedandá dxi Jiobá gudxi Samuel: Gucuaa tobi de ca aceite risaca ne rindáʼ naxhi ca ne guyé Belén ralidxi Isaí. Maʼ guliéʼ tobi de ca xiiñibe para gaca rey. Ora biiyaʼ Samuel Eliab baʼduʼ primé stiʼ Isaí la? guníʼ ique: Ndiʼ nga laabe. Peru Jiobá na: Cadi guuyadxídiluʼ pabiáʼ nasoobe nin pabiáʼ galán laabe. Cadi laadibe guliéʼ para gácabe rey.
Óraque Isaí bicaa ridxi xiiñiʼ, ni láʼ Abinadab que ne rinebe laa ra nuu Samuel. Peru Samuel rabi laabe: Coʼ, Jiobá laaca cadi laadibe gulí. Despué, Isaí redané sti xiiñiʼ, láʼ Samah. Coʼ, Jiobá laaca qué nibí diʼ laabe, na Samuel. Isaí bedané gadxe de ca xiiñiʼ ra nuu Samuel, peru nin tobi de laacabe qué nibí Jiobá. Ñee guiraca ca xiiñiluʼ ndiʼ la? gunabadiidxaʼ Samuel.
Nuu stobi jma nahuiiniʼ. Peru laabe zigápabe dendxuʼ, na Isaí. Ora bedanécabe David la? Samuel biiyaʼ de que guizáʼ galán laabe. Ndiʼ nga laabe, na Jiobá. Bindaate aceite ca íquebe. Ne Samuel runi ni. Despué la? David zaca rey stiʼ guidxi Israel.
