Ododo 58

Daudi ki Goliac

LUPILICITI dok gudwogo ka lweny i kom Icrael. Omegi Daudi madongo adek dong kombeddi gin lumony pa Caulo. Pi meno i nino mo acel Yece owaco bot Daudi ni: ‘Kwany nyig bel mo ki mugati mo iter bot omegini. Tem ngeyo bene kit ma gitye kwede.’

I kare ma Daudi oo i gony pa lumony, en oringo i dog lweny ka yenyo omegine. Twon co me Piliciti Goliac okati obino ka nywaro Luicrael. En obedo ka timo man odiko ki otyeno pi nino 40. En odangnge ni: ‘Wuyer danowu mo acel me lweny kweda. Ka en oloyo ci oneka, wan wadoko opiiwu. Ento ka an aloyo ce aneke, wun wudoko opiiwa. Ka wutek wumiya dano mo wek walweny kwede.’

Daudi openyo lumony mogo ni: ‘Gin ango ma dano ma bineko lapiliciti man ci kwanyo lewic woko ki i kom Icrael binongo?’

Lamony-nyi ogamo ni: ‘Caulo bimiyo lonyo madwong bot dano meno. Dok en bimiye nyare me bedo dakone.’

Ento Luicrael ducu onongo gilworo Goliac pien en onongo dit adada. En onongo bor kato futi 9 (cokcok mita 3), dok onongo tye ki lamony mukene ma tingo kwotte.

Lumony mogo gucito ci guwaco ki Kabaka Caulo ni Daudi mito lweny ki Goliac. Ento Caulo owaco bot Daudi ni: ‘In pe itwero lweny ki Lapiliciti-ni. In latin awobi mamwa, ento en obedo lamony i kwone ducu.’ Daudi ogamo ni: ‘An aneko nguu ki labwor ma onongo gumako romi pa wora. Dok Lapiliciti man obidoko marom kwedgi. Jehovah bikonya.’ Pi meno Caulo owaco ni: ‘Citi, wek Jehovah obed kwedi.’

Daudi ocito piny i laora kulu ci okwanyo gweng mapwot abic, ci oketo i kicaane. I ngeye okwanyo latangdiyone ci ocito ka rwatte ki twon co-ni. Ka Goliac onene, en pe onongo twero ye. En otamo ni obibedo yot tutwal me neko Daudi.

Goliac owaco ni: ‘Bin mere bota, abimiyo ringo komi me acama bot winyo ki lee.’ Ento Daudi owaco ni: ‘In bino bota ki pala lucwan ki tong, ento an bino boti i nying Jehovah. Tin Jehovah obimiyo in i cinga dok abiceli areti piny.’

Ka kenyo Daudi oringo tung bot Goliac. En okwanyo lagweng ki i kicaane, oketo i latangdiyone, ci oyuyo ki tekone ducu. Lagweng-ngi ocurre ocito atir i wi Goliac, ci en opoto piny oto woko! Ka Lupiliciti guneno ni oteka lwenygi opoto piny, gin ducugulokke ci guringo woko. Luicrael guryemo korgi ci guloyo lweny.

1 Camuel 17:1-54.