FILISTIBI ɔmɛ ba ekohu kaa a kɛ Israel ma ta hwumi. David nyɛminyumuhi nikɔtɔma etɛ ɔmɛ piɛɛ Saul ta hwuli ɔmɛ a he. Lɔɔ he ɔ, ligbi ko Ishai de David ke: ‘Ngɔɔ ngma kɛ abolo bɔɔ kɛ ya ha o nyɛmimɛ ɔmɛ, konɛ o kɛ hyɛ bɔnɛ a ngɛ ha.’

Benɛ David ya su a sito he ɔ, e tu fo kɛ ho ta a nya ya nɛ e ya hla e nyɛmimɛ ɔmɛ. Filistino oblai nɛ ji Goliat ɔ je kpo nɛ e ba ye Israelbi ɔmɛ a he fɛu. E kpa ngmlaa ke: ‘Nyɛ je nyɛ ti nɔ kake nɛ e kɛ mi nɛ ba nɔ kunɔ. Ke e gbe mi ɔ, wa ma plɛ nyɛ nyɔguɛhi. Se ke i gbe lɛ ɔ, lɛɛ nyɛ ma plɛ wa nyɔguɛhi. Nyɛɛ lɛɛ nyɛ je nɔ ha mi konɛ e kɛ mi ba kpe nɛ waa hyɛ.’ E pee enɛ ɔ nyɔ kɛ pia, ligbi 40 sɔuu.

David bi ta hwuli ɔmɛ a kpɛti ni komɛ ke: ‘Ke nɔ ko gbe Filistino nɛ ɔ, nɛ e je Israel kɛ je ahlua bɔmi nɛ ɔ mi ɔ, mɛni a ma ha lɛ?’

Ta hwuli ɔmɛ a kpɛti nɔ kake de David ke: ‘Saul maa ke jamɛ a nɔ ɔ ní babauu. Nɛ e ma ha lɛ e biyo hu nɛ e ngɔ.’

Se Israelbi ɔmɛ tsuo ngɛ Goliat gbeye yee ejakaa e je oblai nitsɛ. E ka pe nine mi blimi nyɔngma kɛ etɛ, nɛ e ngɛ ta hwulɔ kpa nɛ hɛɛɔ e tsɛ̃i ɔ kɛ haa lɛ.

Israel ta hwuli ɔmɛ eko ya de Matsɛ Saul kaa David suɔ kaa e kɛ Goliat maa nɔ kunɔ. Se Saul de David ke: ‘O be Filistino nɛ ɔ nyɛe. Ejakaa niheyo wayoo kɛkɛ ji mo, se lɛɛ e bɔni ta hwumi kɛ.’ David he nɔ ke: ‘I gbe osisiblisi kɛ jata ko nɛ ba nu ye tsaatsɛ to ɔmɛ eko ɔ. Nɛ ma pee Filistino nɛ ɔ kaa bɔnɛ i pee lohwe nɛ ɔmɛ ɔ. Yehowa maa ye bua mi.’ Lɔɔ he ɔ, Saul de David ke: ‘Yaa, Yehowa nɛ piɛɛ o he.’

David ya pa tue nɛ e ya kukuɔ dongo tɛ enuɔ, nɛ e ngɔ wo e kotoku ɔ mi. Kɛkɛ nɛ e ngɔ e amlami ɔ, nɛ e pue nɔ kɛ ho konɛ e kɛ Goliat oblai ɔ nɛ ya kpe. Benɛ Goliat na lɛ ɔ, e pee lɛ nyakpɛ. E susu kaa David gbemi be yee ha lɛ kulaa.

Goliat de lɛ ke: ‘Moo lɛɛ moo ba, nɛ ma ngɔ o helo kɛ ha lohwe pɛlitsɛmɛ kɛ nga mi lohwehi nɛ a ye.’ Se David de lɛ ke: ‘Moo lɛɛ o ma ye ngɔ kɛ klaate, kɛ akplɔ kɛ kɛ̃ɛ̃, se imi lɛɛ i ma o ngɔ ngɛ Yehowa biɛ mi. Mwɔnɛ ɔ ligbi nɛ ɔ, Yehowa maa ngɔ mo kɛ wo ye dɛ mi, nɛ ma gbe mo.’

Kɛkɛ nɛ David sa fo konɛ e kɛ Goliat nɛ ya kpe. E je tɛ kake kɛ je e kotoku ɔ mi kɛ wo amlami ɔ mi, nɛ e fɔ kɛ e he wami tsuo. Tɛ ɔ ya fia Goliat hɛ nya kɛ sɛ e yi mi, kɛkɛ nɛ e nɔ si nɛ e gbo! Nɛ benɛ Filistibi ɔmɛ na kaa a tatsɛ ɔ gbo ɔ, mɛ tsuo a tu fo. Israelbi ɔmɛ nyɛɛ a se, nɛ a ya ye a nɔ kunimi.