PU FILISTEO che ka küpayngün ñi kewayafiel Israel mew. David ñi küla wünen peñi müleyngün Saul ñi pu awkafe (weychafe) engün. Feymu lle kiñe antü Jese feypifi ta David: ‘Yenge fün ketran, ka kofke tami pu peñi. Inaduamnge chumlen engün.’

Akulu David chew ñi umañkemum engün, lefi ñi kintuafiel tañi pu peñi chew ñi pepikawkemum engün tañi awkayal (weychayal). Ti fütra wentru filisteo Goliat, triparkey ñi ayentuafiel tati pu Israel che. Tüfachi dungu femmekey fill puliwen, ka fill pun meli mari antü. Wirari: ‘Dullifimün kiñe wentru ñi kewayaetew iñche. Wewngeli ka langümngeli, iñchiñ eymün tamün kona ngetuayiñ. Welu wewli ka langümfili, kom eymün iñchiñ tañi kona ngetuaymün. Kintukaduamün tamün dulliafiel kiñe wentru ñi femal tüfa.’

David ramtufi kiñeke awkafe: ‘¿Chem elungeay feychi wentru langümfile tüfachi Filisteo che, ka montulafiel tüfachi yewen-ngechi dungu Israel mew?’

‘Saul eluafi fentren falin-ngechi chemkün, ka eluafi kidu ñi ñawe ñi kurengeal’, pirkey kiñe awkafe.

Welu itrokom pu Israel che llükaniefingün ta Goliat, müna fütra wentru ngey. Ñi alüpüralen fey epe epu rume ta kakelu che, ka niey kangelu awkafe ñi yenieleetew chi eskudo.

Kiñeke pu awkafe feypimefi ti longko Saul: ‘David ayüy ñi kewatuafiel Goliat.’ Welu Saul feypifi ta David: ‘Pepi femlayaymi. Eymi kiñe pichi weche wentru ngeymi, welu kidu rumel awkafe ngey.’ David llowdunguy: ‘Iñche langümfiñ kiñe oso, ka kiñe trapial (fücha peñi) yeñmafilu tañi chaw ñi pu ufisa. Fewla tüfachi Filisteo che femafiñ fey reke. Jewba kelluaenew.’ Fey mew tüfa, Saul feypifi: ‘Amunge, ka Jewba müley eymi engu.’

David trekanagi kiñe lewfü mew, ka nüfi kechu luyüf kura ka tukufi ñi kutama mu. Fey mew püray ñi kewafiel feychi fütra wentru, ka yeniey ñi witruwe. Goliat pefilu, illamkafi. Küdawngelay ñi langümafiel David trokiwi.

‘Küpange faw, ka eluñmayafiñ tami kuerpu ñi iñmayaetew pu üñüm ka pu kulliñ’, pi Goliat. Welu David llowdungueyew: ‘Eymi küpaymi iñche mew nieymi kiñe fütra kuchillo ka kiñe wayki, welu iñche traftuayu Jewba ñi üy mew. Fachantü Jewba eluaymew iñche ñi kuwü mew ka iñche wewayu.’

Fewla David lef amuy Goliat püle mew. Nentuy ñi kutama mew kiñe kura, elkünuy ñi witruwe mew, ka ütrüftufi Goliat kom ñi newen mu. ¡Chi kura konpuy Goliat ñi longko mew, fey mu trananagi, fey lay! Pefilu engün ñi doy küme awkafe tranalelu mapu mu, pu Filisteo che lefmawi engün. Pu Israel che inafingün, ka wewi ti awkan.