ABAPELISHITI na kabili baile mu kulwisha abena Israele. Abakalamba ba kwa Davidi batatu, bali pa baume ba bulwi aba kwa Shauli. Bushiku bumo Yese aebele Davidi ati: ‘Senda ingano ne mikate utwalile abakalamba bobe. Uyemona ne fyo bali.’

Ilyo Davidi afikile mu nkambi ya bashilika, abutukiile apali abashilika pa kuti afwaye abakalamba bakwe. Galyati, umuPelishiti uwali ipaka atendeke ukutumfya abena Israele. Ifi fine e fyo alecita pa nshiku 40, ulucelo ne cungulo. Apundile ati: ‘Saleni umwaume umo pali imwe uwa kuti ndwe nankwe. Nga alancimfya no kunjipaya, ninshi tukaba abasha benu. Lelo nga nine nalacimfya no kumwipaya, ninshi ni mwe mukaba abasha besu. Kanshi fwayeni bwangu umuntu uwa kuti ndwe nankwe.’

David aipwishe abashilika bamo ati: ‘Bushe finshi uukepaya uyu muPelishiti no kufumya umusebanya pali Israele bakamupeela?’

Umushilika amwaswike ati: ‘Shauli akamupeela ifyuma ifingi. Kabili akamupeela no mwana wakwe umwanakashi ukuti akabe umukashi wakwe.’

Lelo abena Israele bonse baletiina Galyati pantu ali ipaka. Galyati ali umutali sana, alepele amamita yatatu, kabili alikwete uwalemusendela ica kumucinga.

Abashilika bamo baile-eba Imfumu Shauli ukuti Davidi alefwaya ukulwisha Galyati. Lelo Shauli aebele Davidi ati: ‘Te kuti ulwe no yu umuPelishiti. Iwe uli mwaice lelo Galyati mushilika ukutula ku bwaice.’ Davidi ayaswike ati: ‘Nalipeye bere ne nkalamo ifyalefwaya ukulya impaanga sha batata. No yu wine umuPelishiti nalamwipaya. Yehova alangafwa.’ E ico Shauli atile: ‘Cisuma kabiye, shi Yehova abe na iwe.’

Davidi aile ku mumana no kutoola amabwe 5 ayatelela no kuyabika mu cola. Lyena abuulile ica kupooselako amabwe no kutendeka ukuya ukwalefumina ipaka. Ilyo Galyati amwene Davidi aleisa, alipapile sana. Ena alemona kwati tacayafye ukwipaya Davidi.

Galyati atile: ‘Palama kuno. Nalapeela umubili obe ku fyuni na ku finama ukuti filye.’ Lelo Davidi atile: ‘Iwe waisa kuli ine no lupanga ne fumo na kalifumo, lelo ine ndeisa kuli iwe mwi shina lya kwa Yehova. Buno bushiku Yehova alekupeela mu minwe yandi kabili ndekwipaya.’

Lyena Davidi abutukile kuli Galyati. Abuulile ilibwe mu cola cakwe no kulibika mwi legeni lya kulashilako no kulipoosa na maka sana. Ilibwe lyailelasa Galyati pa mpumi e lyo awa no kufwa afwa! Ilyo abaPelishiti bamwene ukuti Galyati uwalecimfya sana mu bulwi awa, bonse batendeke ukubutuka. Abena Israele bakonkele abaPelishiti ulubilo mpaka babacimfya.