David na Goliat
EHUNGI 58
David na Goliat
OVAFILISTI ve ya rukwao okurwisa Ovaisrael. Omarumbi waDavid yetatu nambano ve ri motjimbumba tjaSaul tjovita. Mena ranao Isai wa raera David: ‘Toora ovikokotwa nozomboroto u tware komarumbi woye. Ka tjiwe kutja owo ve ri vi.’
David tja va za pondanda yovita, eye wa tupuka kotuteto twomarwiro okukapaha omarumbi we. Omurenaka Omufilisti Goliat we ya okutoka Ovaisrael. Eye wa tjita nao omuhuka nongurova aihe oure womayuva 40. Eye wa ravaera: ‘Toororeye umwe wovarumendu veṋu me ye tu rwe. Eye tja taara nu e ndji zepa, ete matu rire ovakarere veṋu. Nungwari ami tji mba taara nemu zepa, eṋe mamu rire ovakarere vetu. Ami me mu tanda toororeye umwe weṋu tu rwe.’
David wa pura ovarwe vovita tjiva: ‘Omurumendu ngu ma zepa Omufilisti ngwi na kutura Ovaisrael komanyekerero ma pewa tjike?’
Omurwe umwe wa tja: ‘Saul ma yandja outumbe ouingi komurumendu ngo nu wina me mu pe omusuko we okurira omukazendu we.’
Nungwari Ovaisrael avehe aave tira Goliat mena rokutja eye wa ri omunene tjinene. Eye wa ri noure wozometa mangara ndatu nu eye wa ri nomurumendu omurwe warwe ngwe mu tjindire oruvao rwe.
Ovarwe vovita tjiva va ya okukaraera ombara Saul kutja David ma vanga okurwisa Goliat. Nungwari Saul wa raera David: ‘Ove ko nakuyenena okurwisa Omufilisti ngwi. Ove ngunda oove omuzandona, nu eye omurwe wovita oure womuinyo we auhe.’ David we mu zira na tja: ‘Ami mba zepa ongu nongeyama nḓa toorere ozonḓu zatate. Nu Omufilisti ngwi ma sana ku tjimwe tjavyo. Jehova me ndji vatere.’ Okuzambo Saul wa tja: ‘Twende, nu Jehova nga kare puna ove.’
David wa ya koruramba nu a toora omawe yetano omaheze, nu e ye twa mondjaṱu ye. Okuzambo wa toora otjitakwa tje na i okukahakaena nomurenaka. Goliat tje mu muna, kari nongamburiro. Eye ee ripura kutja ma rire oupupu okuzepa David.
Goliat wa tja: ‘Indjo uriri ku ami nu ami me yandja onyama yoye kozonḓera novipuka ovinyondorore vi rye.’ Nungwari David wa tja: ‘Ove mo ya ku ami nengaruvyo nenga nekatana, nungwari ami me ya kove mena raJehova. Ndinondi Jehova me ku yandja meke randje nu ami me ku zepa.’
Okuzambo David wa tupuka okuhungama Goliat. Eye wa toora ewe okuza mondjaṱu ye, e ri twa motjitakwa tje nu e ri yumbu nomasa we aehe. Ewe ra hungama otjiuru tjaGoliat, nu eye wa wa na koka! Ovafilisti tji va muna kutja ombangaṋe yawo ya u, owo avehe va tupuka. Ovaisrael ve ve ramba nave taara otjirwa.
Mo yenene okutara ku imbi wina
HONGA OVANATJE VOYE
David kari nemuma
Lesa ehungi rOmbeibela ewa ndi, u tjiwe kutja otjikeṋa tji tja vatera David.
