AHWO-Filistia a tẹ wariẹ nyaze te họre Izrẹl. Iniọvo ekpako esa erọ Devidi erọ eva ogbaẹmo Sọl enẹna. Koyehọ ẹdẹjọ Jẹsi ọ tẹ ta kẹ Devidi nọ: ‘Rehọ eka jọ gbe ikulu emodaka rose inievo ra. Kiẹ kpahọ epanọ a bi ru te.’

Oke nọ Devidi o ro te ọko ogbaẹmo na, ọ tẹ dhẹ ruọ eva uhie ẹmo na be gwọlọ inievo riẹ. Goliat ogwara Ahwo-Filistia ọ tẹ nyavia be rehọ Ahwo-Izrẹl ro je hwẹ. Ọ be hai ru onana ohiohiẹ gbe owọwọ kpobi anwọ edẹ 40. Ọ tẹ va gaga a nọ: ‘Wha ha ọzae ọvo jọ no evie rai ze te họre omẹ. Ọ tẹ kparobọ je kpe omẹ, ma rẹ jọ erigbo rai. Rekọ mẹ tẹ kpare obọ je kpei wha vẹ jọ erigbo mai. Me seha nọ wha rehọ ohwo jọ ze te họre omẹ.’

Devidi ọ tẹ nọ egbaẹmo jọ onọ: ‘Eme a rẹ kẹ ohwo nọ okpe ohwo Filistia nana re o je si Izrẹl no omovuọ nana?’

Egbaẹmo na a tẹ ta nọ: ‘Sọl ọ rẹ te kẹ ohwo yena efe buobu. Ọ vẹ te jẹ rehọ ọmọtẹ riẹ rọ kẹe re ọ jọ aye riẹ.’

Rekọ Ahwo-Izrẹl kpobi ozọ Goliat u bi mu ai keme ọrro vi ere. Otheri vi irula 9 (ọwọhọ imita 3), yọ o wo egba-ẹmo efa nọ ebe wha ojese riẹ rọ kẹe.

Egbaẹmo jọ e tẹ nya e vuẹ Sọl ovie inọ Devidi ọ gwọlọ họre Goliat. Rekọ Sọl ọ tẹ ta kẹ Devidi nọ: ‘Whọ sae họre Ohwo-Filistia ọnana ha. Whẹ ọmọ-gheghe, ọye ọrọ ọgbaẹmo kri no eva uzuazọ riẹ kpobi.’ Devidi ọ tẹ za nọ: ‘Me kpe adaka gbe okpohrokpo nọ ọ wọ ogodẹ ọsẹ mẹ vrẹ. Yọ Ohwo-Filistia nana ọ te jọ wọhọ ọvo rai jọ. Jihova o re ti fiobọhọ k’omẹ.’ Fikiere Sọl ọ tẹ ta nọ: ‘Nya, jọ Jihova ọ jọ kugbe owhẹ.’

Devidi ọ tẹ nya kpotọ kpobọ eyeri-ame na ọ tẹ tọlọ ibitho isoi nọ i re rioriorio, o te fiai họ eva ẹkpa riẹ. Kẹsena ọ tẹ tọlọ ogbalọ riẹ ọ tẹ nya i zere ogwara na. Okenọ Goliat ọ rue riẹ u murie ẹro ho. O roro nọ o rẹ te jọ lọlọhọ re o kpe Devidi.

Goliat ọ tẹ ta nọ: ‘Jẹ nya bruomẹ ze, re mẹ te rehọ ugboma ra rọ kẹ evra gbe erao re a re.’ Rekọ Devidi ọ tẹ ta nọ: ‘Whẹ be nyabru omẹ ze avọ ọgbọdọ, ozuẹ, gbe adhara, rekọ mẹ be rehọ odẹ Jihova rọ nya bru owhẹ ze. Nẹnẹ na Jihova ọ be rehọ o whẹ fihọ abọ mẹ, mẹ vẹ te tehe owhẹ fihọ otọ.’

Eva oyena Devidi ọ tẹ be dhẹ bru Goliat. Ọ tẹ tọlọ ubiutho no eva ẹkpa riẹ ze, o te fiehọ eva ogbalọ riẹ, ọ tẹ rehọ ogaga nọ o riẹ oma kpobi ro fiei. Ubiutho na o tẹ la ovaọvo nya ikie Goliat uzou, o te kie fihọ otọ whu! Nọ Ahwo-Filistia a ruẹ nọ ọ gba rai okie no, ai kpobi a kwoma rẹriẹ a tẹ dhẹ. Ahwo-Izrẹl a tẹ rọ tua’e a tẹ kpare obọ ẹmo na.