Ngewa ya 58: Ndaviti na Ngoliathu
AVILISITI nĩmookie ĩngĩ kũkita na Aisilaeli. Ana-a-inyia atatũ ma Ndaviti maĩ nthĩnĩ wa ita sya Saulo. Kwoou mũthenya ũmwe Yese eea Ndaviti: ‘Osa lĩu wa mbaa ngetha na imũtũ, ũtwaĩe ana-a-mwenyu. Na ũimanya ũndũ mailyĩ.’
Ndaviti avika kambinĩ ya ita, nĩwasembie athi vala kaũ waĩ nĩ kana akamanthe ana-a-inyia. Na ĩmũndũ ĩnene Ĩmũvilisiti yeetawa Ngoliathu yaũmĩla yĩthekee Aisilaeli. Ngoliathu eethĩĩtwe ayĩka ũu kĩoko na wĩoo kwa mĩthenya 40. Nake anĩĩasya ayasya: ‘Nyuvai ũmwe katĩ wa aũme menyu okite nakwa. Ethĩwa akanzinda na kũmbũaa, tũkatw’ĩka ngombo syenyu. Ĩndĩ ethĩwa ngamũsinda na kũmũaa, mũkatw’ĩka ngombo sitũ. Nĩngũmũthea nenganai mũndũ nĩ kana nũkite nake.’
Nĩvo ĩndĩ Ndaviti wakũlilye amwe ma asikalĩ: ‘Mũndũ ũla ũnũkũaa Mũvilisiti ũũ na kũvonokya Isilaeli kuma kĩvũthyanĩ kĩĩ akanengwa kyaũ?’
Na ũmwe woo amwĩa, ‘Saulo akanenga mũndũ ũsu ũthwii mwingĩ. Na akamũnenga mwĩĩtu wake atw’ĩke mũka.’
Ĩndĩ Aisilaeli onthe nĩmamũkĩaa Ngoliathu nũndũ aĩ mũndũ mũnene mũno. Aĩ na ũasa ta wa mita 3, na aĩ na mũsikalĩ ũngĩ wamũkuĩe ngao.
Asikalĩ amwe nĩmaendie na matavya Saulo kana Ndaviti nũkwenda kũkita na Ngoliathu. Ĩndĩ Saulo eea Ndaviti: ‘Ndũtonya kũkita na Mũvilisiti ũsu. Nũndũ wĩ o kĩmwana, nake ethĩĩtwe e mũsikalĩ kuma wana wake.’ Nake Ndaviti amũsũngĩa: ‘Nyie nĩnooaie nduva na mũnyambũ ila syakwatĩte na kũkua malondu ma nau. Na Mũvilisiti ũũ akeethĩwa ta ĩmwe yasyo. Yeova akandetheesya.’ Kwoou Saulo asya: ‘Thi, na Yeova ethĩwe vamwe naku.’
Kwoou Ndaviti atheea kalũsĩnĩ na oosa mavia atano matendeu, na amekĩa ngusunĩ yake. Na oosa kĩkũtha kyake na athi akakomane na ĩmũndũ yĩu. Ngoliathu amwona Ndaviti, ndaaĩkĩĩa. Asũanĩaa nĩ ũndũ mũvũthũ mũno kũmũaa Ndaviti.
Kwoou Ngoliathu asya, ‘Ũka vaa nĩĩ, nakwa nĩngũnenga nyũnyi na nyamũ mwĩĩ waku iye.’ Ndaviti nake amwĩa: ‘We wĩmbũkĩa na ũvyũ, na ĩtumo, ĩndĩ nyie nĩkũkĩa na syĩtwa ya Yeova. Mũthenya ũũ Yeova nũkũũnengane kw’okonĩ kwakwa; nakwa nĩngũũkũna ngũae.’
Na ĩndĩ Ndaviti asemba elekele kũla kwĩ Ngoliathu. Na oosa ĩvia kuma ngusunĩ yake na ayĩkĩa kĩkũthanĩ kyake, na ayĩkya na vinya wake w’onthe. Nayo yakima na yalika mũtwenĩ wa Ngoliathi, nake avalũka nthĩ akw’a! Yĩla Avilisiti moonie kana mũkiti woo mũnene nĩwakw’a, makũka makĩa. Namo Aisilaeli mamasembany’a na masinda kaũ ũsu.
1 Samueli 17:1-54.
Makũlyo
- Ngoliathu atheie ita sya Aisilaeli kwa kũmea meke ata?
- Ngoliathu aĩ na ũnene mwaũ, na Mũsumbĩ Saulo athĩte mũndũ ũla ũkoaa Ngoliathu ĩtuvi yaũ?
- Ndaviti aisye ata Saulo amwĩa kana ndatonya kũkita na Ngoliathu nũndũ Ndaviti nĩ kĩmwana?
- Nthĩnĩ wa ũsũngĩo wake kwa Ngoliathu, Ndaviti oonanisye ata wĩkw’atyo wake nthĩnĩ wa Yeova?
- O tondũ ũtonya kwona vaa visanĩ, Ndaviti atũmĩie kyaũ kũaa Ngoliathu, na kwethĩiwe ata kwa Avilisiti ĩtina wa ũndũ ũsu?
Makũlyo ma kwongeleela
- Soma 1 Samueli 17:1-54.
Kĩmbithĩ kya ũkũmbaũ wa Ndaviti kyaĩ kyaũ, na tũtonya kũatĩĩa ũkũmbaũ wake ata? (1 Sam. 17:37, 45; Aev. 6:10, 11)
Nĩkĩ Aklĩsto maĩlĩtwe nĩkwĩvathana na veva wa kũsindana ta ũla wa Ngoliathu yĩla meũthaũka kana mekw’ĩtanĩthya? (1 Sam. 17:8; Aka. 5:26; 1 Tim. 4:8)
Ndeto sya Ndaviti syoonanisye ata kana aĩ na mũĩkĩĩo Ngai nũkũmũtethya? (1 Sam. 17:45-47; 2 Mav. 20:15)
Ngewa ĩno yĩonany’a ata kana ũũ ndwaĩ o kaũ katĩ wa ita ilĩ tũ, ĩndĩ waĩ kaũ katĩ wa ngai sya ũvũngũ na Ngai wa w’o Yeova? ((1 Sam. 17:43, 46, 47)
Etĩkĩw’a mauta ala matialĩte maatĩĩaa ngelekany’o ya Ndaviti ya kũmwĩkwatya Yeova ata? (1 Sam. 17:37; Yel. 1:17-19; Ũvu. 12:17)
No Wendeewʼe Nĩ Ii
MANYĨSYA SYANA SYAKU
Ndaviti Ndaĩ na Wia
Soma ngewa ĩno ya Mbivilia ya kwendeesya nĩ kana ũmanye kĩla kyatumie Ndaviti ũtethĩwa na wia.
