EBʼ LAJ Filisteo keʼchalk wiʼ chik chi yalok saʼ xbʼeenebʼ laj Israel. Li oxibʼ chi ras laj David wankebʼ choʼq aj puubʼ rikʼin laj Saul. Joʼkan naq saʼ jun kutan laj Jese kixye re laj David: ‹Ilebʼ chaq chanru wankebʼ laawas. Ut kʼamebʼ xtzakahemq›.

Naq laj David kiwulak saʼ xyanqebʼ laj puubʼ kiʼok xsikʼbʼalebʼ li ras. Laj Goliat kiʼelk chaq chi xhobʼalebʼ laj Israel. Kixhobʼebʼ chiru 40 kutan. Tojaʼ naq kixye: ‹Sikʼomaq junaq winq re naq tyaloq wikʼin. Wi tinxkamsi, tookanaaq choʼq eemoos. Abʼan wi tinkamsi texkanaaq choʼq qamoos. Joʼkan naq sikʼomaq junaq saʼ eeyanq re naq tyaloq wikʼin›.

Laj David kixye rehebʼ laj puubʼ: ‹Kʼaru tkʼeheʼq re li ani tkamsinq re laj Filisteo re naq inkʼaʼ tkanaaq saʼ xutaan li tenamit Israel?›

Jun laj puubʼ kixye re laj David: ‹Laj Saul tixbʼaanu naq li winq aʼin tbʼihomoʼq ut tixkʼe li xrabʼin choʼq rixaqil›.

Chixjunilebʼ laj Israel nekeʼxuwak chiru laj Goliat, xbʼaan naq oxibʼ meetr xnajtil roq. Jun laj puubʼ naxkʼam li xsursuukil chʼiichʼ laj Goliat.

Wiibʼ oxibʼ rehebʼ laj puubʼ keʼxye chaq re laj Saul naq laj David traj yalok rikʼin laj Goliat. Tojaʼ naq laj Saul kixye re laj David: ‹Inkʼaʼ tatruuq chi yalok rikʼin laj Goliat, Xbʼaan naq toj kachʼinat. Li winq aʼin aj puubʼ ut kʼaynaq chi yalok›. Laj David kixye re laj Saul: ‹Laaʼin xinkamsi jun li oso ut jun li kaqkoj, li xeʼkʼamok re xkarneer linyuwaʼ. Joʼkan ajwiʼ tixkʼul saʼ wuqʼ laj Filisteo. Li Jehobʼa ttenqʼanq we›. Joʼkan naq laj Saul kixye re laj David: ‹Ayu, li Jehobʼa taxaq ttenqʼanq aawe›.

Laj David kixxok oobʼ chi pek saʼ li nimaʼ ut kixkʼe saʼ xchampa. Chirix chik aʼan kixkʼam chirix li xrantʼin ut xko xtawbʼal chaq laj Goliat. Naq laj Goliat kiril ru laj David, kixkʼoxla naq moko chʼaʼaj ta chiru xkamsinkil.

Chirix chik aʼan laj Goliat kixye re laj David: ‹Jilonk chaq arin re naq tinkʼe laatibʼel rehebʼ li xul›. Abʼan laj David kixye re: ‹Laaʼat nakatchalk saʼ inbʼeen rikʼin laajutzʼ chʼiichʼ, abʼan laaʼin tinxik saʼ aabʼen saʼ xkʼabʼaʼ li Jehobʼa. Li Jehobʼa tatxkʼe saʼ wuqʼ re naq tatinkamsi›.

Laj David kiʼaanilak chi xtawbʼal laj Goliat. Tojaʼ naq kixkʼe jun li pek chiru li xrantʼin ut kixkut chi anchal xchʼool saʼ xbʼeen laj Goliat. Li pek kiʼok saʼ xjolom laj Goliat ut kikamk. Naq ebʼ laj Filisteo keʼril aʼin, keʼelelik. Tojaʼ naq ebʼ laj Israel xkohebʼ chirix ut keʼelk chiʼus saʼ li yalok.