RĨU ningĩ Afilisiti magĩũka kũhũrana na Isiraeli. Nao ariũ atatũ a nyina na Daudi arĩa akũrũ me mbũtũ-inĩ ya ita rĩa Saulu. Mũthenya ũmwe Jesii akĩĩra Daudi atĩrĩ: ‘Ũkĩra woe eba ĩmwe ya ngano na mĩgate ũtwarĩre ariũ a nyũkwa. Ũrore ũrĩa matariĩ.’

Rĩrĩa Daudi aakinyire kĩraro-inĩ kĩa mbũtũ-rĩ, agĩteng’era gĩkundi-inĩ gĩa ita arore ariũ a nyina. Goliathu njamba nene ya Afilisiti ĩgĩũka ĩyumĩrĩtie kũnyũrũria Aisiraeli. Akoretwo agĩka ũguo o rũciinĩ na hwaĩ-inĩ ihinda rĩa mĩthenya 40. Akĩanĩrĩra akiuga atĩrĩ: ‘Wĩthurĩrei mũndũ ũmwe wanyu ahũrane na niĩ. Aahũra anjũrage-rĩ, tũgĩtuĩke ndungata cianyu. No ndamũhota ndĩmũrage, mũgũtuĩka ndungata ciitũ. Ndamũnyararithia, ũmwe wanyu oke tũrũe.’

Daudi akĩũria amwe a athigari atĩrĩ: ‘Ĩ atĩ mũndũ ũrĩa ũrĩũraga Mũfilisiti ũyũ, eherie rũmena harĩ Isiraeli, egwĩkwo atĩa?’

Mũthigari ũmwe akĩmũcokeria atĩrĩ, ‘Saulu nĩ ekũmũtongia. Na amũhe mwarĩ atuĩke mũtumia wake.’

Ĩndĩ Aisiraeli othe nĩmetigĩrĩte Goliathu tondũ aarĩ mũnene mũno. Aarĩ na ũraihu wa gũkĩra buti 9 (ta meta 3), na aarĩ na mũthigari ũngĩ wamũkuagĩra ngo yake.

Thigari imwe igĩthiĩ ikĩĩra Mũthamaki Saulu atĩ Daudi nĩ arenda kũrũa na Goliathu. Nake Saulu akĩĩra Daudi atĩrĩ: ‘Wee ndũngĩhota kũhũrana na Mũfilisiti ũcio. Nĩ ũndũ wee ũrĩ o mũndũ mũnyinyi, nake aatuĩkire mũndũ wa ita kuuma arĩ o mũnyinyi.’ Daudi agĩcokia atĩrĩ: ‘Nĩ ndoragire nduba o na mũrũthi iria cianyitĩte ng’ondu cia baba. Na Mũfilisiti ũyũ agũtuĩka ta ĩmwe yacio. Jehova nĩ ekũndeithia.’ Saulu akĩmwĩra atĩrĩ: ‘Thiĩ, Jehova nĩ egũikara hamwe nawe.’

Daudi agĩikũrũka karũũĩ-inĩ, agĩĩthurĩra tũhiga tũtano tũnyoroku, agĩtwĩkĩra kondo-inĩ gake. Nake akĩoya kĩgũtha agĩthiĩ gũtũngana na Mũfilisiti ũcio. Goliathu aamwona, akĩmũnyarara. Agĩciria nĩ kaũndũ kanini mũno kũraga Daudi.

Goliathu akĩmwĩra atĩrĩ, ‘Ũka harĩ niĩ, na nĩngũkũnengera nyamũ cia rĩera-inĩ, o na cia werũ.’ Nake Daudi akĩmwĩra atĩrĩ: ‘Wee ũgũũka harĩ niĩ na rũhiũ rũa njora, na itimũ rĩa mwenjerere, na rĩa kĩberethi, no rĩrĩ, niĩ ngũũka harĩ wee rĩĩtwa-inĩ rĩa Jehova. Mũthenya ũyũ wa ũmũthĩ nĩguo Jehova egũkũneana moko-inĩ makwa, na ngũkũgũtha ngũrage.’

Hĩndĩ ĩyo Daudi agĩtengera erekeire Goliathu. Rĩu akĩruta kahiga kuuma kondo-inĩ gake, agĩkĩra kĩgũtha-inĩ, akĩhiũria na hinya wake wothe. Kahiga kau gagĩcomoka ta rithathi gakĩgũtha thithi wa Goliathu, akĩgũa thĩ agĩkua! Na rĩrĩa Afilisiti monire atĩ njamba yao ĩĩgũkua, makĩũra. Aisiraeli makĩmateng’eria na makĩmatoria.