BENA Filishitiya baishile jibiji na kulwa nkondo na bena Isalela. Pa kino kimye, bakolojanji Davida basatu bajinga mu nzhita ya kwa Saulo. Juba jimo Yese waambijile Davida amba: ‘Batwajile bakolojobe wichi ne bashinkwa. Ukamone ne byo babena kwikala.’

Davida byo afikile ku kampu wa nzhita, wanyemejile mukachi ka nzhita na kumona bakolojanji. Kitonzhi mwina Filishitiya Goliata waishile ne kutendeka kwendeleka bena Isalela. Watwajijile na kwibendeleka pa moba 40 lukelo ne mabanga. Wabijikile na bwitote’mba: ‘Isalulwilai muntu wenu anwe bene, eye alwe ne amiwa. Umvwe akonshe kunshinda ne kungipaya, tusakwikala ke bakalume benu. Pano bino, umvwe ngiye namushinde ne kumwipaya, anweba musakwikala ke bakalume betu. Endeshai, mpai muntu ndwe nanji.’

Davida waipwizhe bashilikale bamo amba: ‘Ki ka kyo bakamupa awa muntu ukepaya uno mwina Filishitiya ne kwibafumya bumvu bena Isalela?’

Mushilikale waambile’mba: ‘Saulo ukapa yeo mwanamulume bunonshi bwavula. Kabiji ukamupa mwananji wa mukazhi kwikala ke mukazhanji.’

Bena Isalela bonse bamuchiinenga Goliata mambo wajinga muntu wabaya bingi ne kulepa. Walepele mamita asatu kabiji wajinga ne na mukwabo mushilikale wamusendelangako jikebo janji.

Bashilikale bamo bayile ne kukabula Mfumu Saulo amba Davida ukeba kulwa na Goliata. Bino Saulo waambijile Davida amba: ‘Kechi wakonsha kumulwisha uno mwina Filishitiya ne. Obewa ukiji mwanyike, kabiji aye wapijilwa kulwa nkondo kufumatu ku bwanyike bwanji.’ Davida wamukumbwile’mba: ‘Naipayile mbeyala ne bokwe basendele mikooko ya batata. Kabiji ne uno mwina Filishitiya wafwainwa kufwa. Yehoba usakunkwasha.’ Onkao mambo, Saulo waambile’mba: ‘Yanga, kabiji Yehoba ekale nobe.’

Davida wayile ku kakola kabiji wakasalulwilemo tumabwe twa nguzha twalamba tutanu ne kwitubika mu fukuta wanji. Washikwile kinzhipunzhipu kyanji ponkapo keafwenye ne kwipi kwi yewa kitonzhi. Goliata byo amumwene, wakuminye bingi. Walangulukile’mba usakumwipaya Davida ne kimye kishaleko.

Goliata waambile’mba: ‘Iyanga, mpane mubiji obe ku bañonyi ne banyama baje.’ Bino Davida waambile’mba: ‘Obewa waiya kwi amiwa na mpoko, na jifumo ne na mpula, pakuba amiwa naiya kwi obewa mu jizhina ja Yehoba. Mu jino juba ja lelo, Yehoba usakukupana obewa mu kuboko kwami, kabiji nsakukwipaya.’

Ponkapo, Davida wayile lubilo na kumutundaila Goliata. Washikwile jibwe mu fukuta wanji wijibika mu kinzhipunzhipu kyanji kabiji wijitayile na ngovu yanji yonse. Jibwe jazhipukile ne kuya na kufikila pa kilungi kya kwa Goliata kabiji ponkapo waponene ne kufwa wafwa! Bena Filishitiya byo bamwene’mba kitonzhi wabo wapona, bonse banyemene lubilo. Bena Isalela bapupijile balwanyi ne kwibashinda.