ABAFILISITI baisa mu kulwa ne baIsilaeli nakabili. Abakulu bakwe Dafidi batatu bali mu maboko ya fita fyakwe Saulu. Kambi kasuba Jese abula Dafidi ati: ‘Bula tiligu pamo na sinkwa ubatwalile abakwanu. Kabili ubone ifi balukwikala.’

Ili Dafidi afika ku cisasa ca fita, abutuka ukuya ukuli inkondo mu kufwaya abakwabo. Eli umwalalume wa makosa Golyati aisa ne kulukutongala abaIsilaeli. Alacite’ci ulucelo ne cingulo pa nsiku 40. Kabilikisya ati: ‘Salululeni umuntu ese mu kulwa na nebo. Kani acimfye ne kunjipaya, penka fwebo eli tukaba abasya benu. Sombi kani nebo ncimfye ne kumwipaya, ninsi mwebo mukalukuli basya besu. Mpelenipo umuntu umo ndwe nakwe.’

Dafidi aipusya ifita ati: ‘Mba nifindo akapoka uyo’muntu uukamwipaya uyu umuFilisiti ne kufumya ukutongala ukwakube’fi pa baIsilaeli?’

Icita caasuka ati: ‘Saulu akamupa amaboni aengi. Kabili akamupa ne mwana wakwe umwanakasi ukubo’mukasi wakwe.’

Pano abaIsilaeli baumfwo’mwenso nipakuti Golyati akulisya. Mutali cipale amamita atatu, lomba ali ne cita cimbi icilukumupintila iŋgabo yakwe.

Ifita fimbi fyaya mu kubula Imfumu Saulu ati Dafidi alukufwaya ukulwa na Golyati. Pano Saulu abula Dafidi ati: ‘Tekuti ulwepo na uyu umuFilisiti. Pakuti webo uli musankwa lukoso, sombi ye muntu wa nkondo mu bwikasi bwakwe bonse.’ Eli angasuka Dafidi ati: ‘Nalipeye inkalamu na beya ifyaikete imbelele ya batata. Lomba uyu umuFilisiti alukuba koti nifyo. BaYehoba balukungofwa.’ Eli Saulu angalabila kuli Dafidi ati: ‘Koya, lomba baYehoba balukuli na webo.’

Eli Dafidi aya mu musesyo wa nika ne kusalulula utubwe utubulungene tusanu, ne kutubika mu cipokolo cakwe. Kabili abula amalekeni, aya mu kukumanya umwalalume umukosele. Ili Golyati amubona, afilwa ukusumina. Alanguluka’ti cilukube’cipubile ukwipaya Dafidi.

Golyati alabila ati: ‘Isa kuli nebo, nakupela umunefu wobe ku fyuni na ku finama ku kuulya.’ Pano Dafidi alabila ati: ‘Webo ulukungisila ne mpoko, ne fumo ne citoto, sombi nebo ndukukwisila mwi sina lya baYehoba. Kano kasuba baYehoba bakukupela mu minwe yangi eli nakukupama.’

Pali fyefyo Dafidi abutuka ukuya kuli Golyati. Abula ne bwe mu cipokolo cakwe, abika na mu malekeni, ne kulasa ne makosa akwe wonse. Ibwe lyaya lukoso pa mpumi yakwe Golyati, kabili kawa pansi umufwile! Popele AbaFilisiti pa kubona ati uubalukupemamo ukubalwila afwa, baaluluka ne kubutuka. AbaIsilaeli babutusya abaFilisiti ne kucimfye’nkondo.

1 Samweli 17:1-54.