Chihande 58

Ndavichi naNgolyate

VAFWILISHITE vaneza cheka nakulwa jita navaIsalele. Vayaya jaNdavichi vatatu vali lyehi muli vaka-kwasa jita vaSaulu. Jino likumbi limwe Yese mwatuma Ndavichi ngwenyi: ‘Vatwalile vayayove kulya chamanona najimbolo. Ukatale omu vali nakutwama.’

Ndavichi hakuheta hachilombo chamaswalale, hikulahila kuze vanalitanjika maswalale atonde vayayenyi. Ndundulume wavaFwilishite, Ngolyate, himweza nakuvahulamisa vaIsalele. Mukiko napunga nakulinga hamakumbi 40, chimene nachingoloshi. Anakuvilika ngwenyi: ‘Sakulenu mutu hamalunga muli navo ezenga tuzunge. Nge mwanguhasa nakungujiha, kaha natupwa tuvandungo jenu. Oloze nge nangumuhasa nakumujiha, kaha namupwa muvandungo jetu. Ngwasake musakule mutu wakuzunga nayami.’

Ndavichi himwehula maswalale vamwe ngwenyi: ‘Navamuhana ika mutu mwajiha ou kaFwilishite nakufumisa kusauka kana hali vaIsalele?’

Maswalale ngwavo: ‘Saulu mwamuhana luheto lwaluvulu. Kaha mwamuhana mwanenyi wapwevo kupwa puwenyi.’

Oloze vaIsalele vosena vanakumuchina Ngolyate mwomwo wamunene chiyovo. Wamusuku kuhambakana kafwe jimita 3, kaha anakutambuka naliswalale muka-kumumbachila kepwe yenyi.

Maswalale vamwe hikuya nakwambulula kuli Mwangana Saulu ngwavo Ndavichi anakusaka kulwa naNgolyate. Oloze Saulu mwalweza Ndavichi ngwenyi: ‘Kaweshi kuhasa kulwa nou kaFwilishiteko. Ove ukanyike kaha, ikiye hiliswalale kufuma kuunyike wenyi.’ Ndavichi ngwenyi: ‘Ngwajihile ulusu nandumba vakwachile mikoko jatata. Kahou kaFwilishite mwapwa nge minavo umwe. Yehova mwangukafwa.’ Jino Saulu ngwenyi: ‘Yako, kaha Yehova apwenga nayove hamwe.’

Ndavichi ashikumukile kulwiji nakunona malolwa asenena atanu, nakuwahaka mungonga yenyi. Kaha ambachile chikapa nakuya nakuhumangana uze ndundulume. Ngolyate hakumumona, amulelesele. Ashinganyekele nge Ndavichi wamwashi kujiha.

Ngolyate ngwenyi: ‘Ove twaya kulyami kaha, nanguhana nyama yove kutujila natunyama vailye.’ Oloze Ndavichi ngwenyi: ‘Ove nawiza kuli ami napoko yamukwale, nalikunga lyalinene nalikunga lyakwasa, oloze ami ngunakwiza kuli ove mulijina lyaYehova. Likumbi lyalelo Yehova mwakuhana mulivoko lyami nakukujiha.’

Kaha Ndavichi hikulaha akaliwane naNgolyate. Kumbata lilolwa mungonga yenyi, kuhaka muchikapa chenyi, nakulyasa nangolo jenyi josena. Lilolwa lyayile hwa-a namuluholo lwaNgolyate ndwa, kaha kwandumuka ngulungu wakufwa! VaFwilishite hakumona ndundulume yavo nandumuka, vosena himwamwa. VaIsalele vavahangasanyine nakuhasa jita kana.

Samwele 1, 17:1-54.