MPANJI 58

Davidi naGoliyati

AFWILISTINU hiyakwinza cheñi nakulwa naIsarela. Ana kwa Davidi awakulumpi asatu ekala dehi amashidika aSawulu. Ifuku dimu Jesi hakumuleja Davidi nindi: ‘Sendaku kudya kwansaachi nimankendi wuyitwalili ana kweyi. Wiluki chanakuhandawu.’

Chanashikiyi Davidi kuchilombu chawamashidika, hakutemukila kunjita nakutala ana kwindi. Goliyati kaFwilistinu wasweja kutaluka hakwinza nakuyisupisha aIsarela. Neli dehi mwenimu hadi mafuku 40 budidi nimelela. Hakubidika nindi: ‘Tondenu iyala wumu hadenu alwi nanami. Neyi wukushinda nakunjaha tukwikala anduñu jenu. Ilaña neyi nishinda nakumujaha mukwikala anduñu jetu. Nayileji nami mutondi muntu wukulwa nanami.’

Davidi hakwihula amashidika nindi: ‘Chumanyi chakamufwetawu muntu wukamujaha iwu kaFwilistinu nakufumisha nsonyi hadi aIsarela?’

Mushidika hakuhosha nindi, ‘Sawulu wakamwinka maheta amavulu. Nawa wakamwinka mwanindi wamumbanda kwikala iñodindi.’

Ilaña aIsarela ejima anakumuchina Goliyati muloña wakusweja kutaluka. Kuleha kwindi kwashika mumamita 3, nawa wukweti mushidika wamusendelaña nkebu yindi.

Amashidika amakwawu hiyakuya nakumuleja Mwanta Sawulu nawu Davidi nakukeña nindi alwi naGoliyati. Ilaña Sawulu hakumuleja Davidi nindi: ‘Hiwukutwesha kulwa naniwu kaFwilistinuku. Wuchidi kansi hohu, nawa yena himukwanjita mukuhanda kwindi kwejima.’ Davidi hakwakula nindi: ‘Najahili bera nimutupa akwatili nyikoku yatata yami. Niniwu kaFwilistinu wukwikala neyi wumu hadi wena. Yehova wukunkwasha.’ Sawulu hakuhosha nindi: ‘Yaña, Yehova ekali naneyi.’

Davidi hakukunkumuka kukaloña anona nitumalola twaselumuka tutanu nakutwinka mufuuba yindi. Dichi hakusenda malekenyi indi nakuya nakubulakana naGoliyati. Goliyati chanamumoniyi Davidi, hakumudiwula. Hakutoñojoka nindi chikwikala chaswayi kumujaha Davidi.

Goliyati hakuhosha nindi, ‘Inzaña kunu, niyinki atujila nianyama mujimba weyi awidyi.’ Ilaña Davidi hakuhosha nindi: ‘Eyi wunenzi kudami nampoku yakabali, iyoña, niyoña danyanya; ilaña ami nenzi kudeyi mwijina daYehova. Yehova wukukwinka muchikasa chami lelu nawa nakukujaha.’

Aha dinu Davidi hakuya lufuchi kudi Goliyati. Hakunona ilola mufuuba yindi adinka nimumalekenyi indi, hakumwasa nañovu yindi yejima. Ilola hidikolokela chikupu kokumutu waGoliyati, hakudimbuka hamaseki hakufwa nikufwa! A Fwilistinu chanamoniwu nawu chilobu chawu nafwi dehi, wonsu wawu hiyakutemoka. A Isarela hiyakuyihaña nawa hiyakushinda njita.

1 Samweli 17:1-54.