Historia 58

David niman Goliat

FILISTEOS oksejpa uajlauej kinualixnamikij israelitas. Yeyimej ikniuan David akin yakatstiuej noijki teuan isoldados Saúl. Ika yejon, se tonajli Jesé kijlia David: ‘Xkimitkili mokniuan tlakuajli. Xkimitati kenon nemij’.

Ijkuak David ajsi kampa nokauaj soldados, yauj notlaloua kampa nemij ikniuan. Yejon uejkapan filisteo akin itoka Goliat uajlauj intech, niman peua kinuejuetskilia israelitas. Ijkon kichiua ika kualkan niman ika yeuajli, ipan 40 tonaltin. Tsajtsi: ‘Xtlapejpenikan yakaj akin manechixnamiki. Tla yejua tetlani niman nechmiktia, tochiuaskej ninemotlakeualuan. San ika, tla nejua nitetlani niman nikmiktia, nemejuamej nenyeskej totlakeualuan. Nimechijlia, xtlapejpenikan yakaj’.

David kintlajtoltia sekimej soldados: ‘¿Tlenon kimakaskej akin kimiktis yejuin filisteo niman kinmakixtis israelitas itech yejuin tlen tepinajti?’

‘Saúl kimakas melak miyek tomin’, kinankilia se soldado. ‘Niman noijki kimakas ichpoch iuan manonamikti.’

San ika, nochimej israelitas kimakasij Goliat pampa melak uejkapan. Yejua kipiya kanaj yeyi metros, niman iuan uajlauj okse soldado tlen kuajkuilia iescudo.

Sekimej soldados yauej kampa tekiuaj Saúl niman kijliaj ika David kineki kixnamikis Goliat. San ika, Saúl kijlia David: ‘Xtiuelis. Ok titelpokatsin, niman yejua youejkauj tekiti kentla soldado’. David kijtoua: ‘Nejua onikmikti ome yolkatl se oso niman se león tlen kinekiyaj kinkuaskej iborregos notaj. Aman noijki mikis yejuin filisteo ken yejon yolkamej. Jehová nechpaleuis’. Kuakon, Saúl kijtoua: ‘Xuiya, niman Jehová mouan manemi’.

David temoua kampa atentli, kitlapejpenia makuijli temej pestijkej niman kintlalia ipan imorral. Kuakon David tlejkoua ika imatematlauj, konixnamiki yejon uejkapan tlakatl. Goliat xkineltoka tlenon panotika. Kinemilia ika uelis nimantsin kimiktis David.

‘Xuajla nikan’, kijtoua Goliat, ‘niman nikinmakas totomej niman yolkamej monakayo’. David kijlia: ‘Tejua tikuajkui moespada, molanza niman se jabalina, san ika, nejua nimitsixnamikis ika Jehová itokatsin. Jehová aman kichiuas ika nejua manimitsmikti’.

Aman David notlaloua kampa nemi Goliat. Okikixti ipan imorral se tetl, okitlali ipan imatematlauj, niman ika nochi ikojtilis okimotlak Goliat. ¡Tetl kalaki ipan itsontekon Goliat, akin miki niman uetsi! Ijkuak filisteos kitaj ika Goliat miki, cholouaj. Israelitas peuaj yauej kintokaj niman tetlanij.

1 Samuel 17:1-54.