YÄ FILISTEO bi ma pa dä ntunkui mänꞌaki yä israelita. Nuꞌu̱ hñuu yä ku mädä Dabid mi yꞌo ko yä soldado Saul. Hänge nꞌa rä pa, Jese bi ꞌñembi Dabid: “Gi ma guä tsokui nuꞌu̱ ri ku nuya yä tꞌehe ꞌne nuya yä thuhme. ꞌNe guä handi mu̱ bi ꞌmu̱i xä ñho”.

Mi zo̱ni Dabid habu̱ xki hyoki yä ngu de gä dutu nuꞌu̱ yä soldado Saul, Dabid nguntꞌä bi ma bä honi yä ku habu̱ xki ju̱ꞌñu nuꞌu̱ yä soldado pa dä ntuhni. Näꞌä nda däta filisteo mi rä thuhu Goliat bi bo̱ni ꞌne mi theni yä israelita. Xki jabu̱ tatꞌä xudi ꞌne tatꞌä xui po 40 yä pa. Mi mafi: “Huahnihu̱ nꞌa toꞌo dä ehe dä ntuhni kongeki. Mu̱ dä ntäte ꞌne dä hyogägi, nuꞌmu̱ gä mꞌe̱gohe. Pe mu̱ go gä ntäte ꞌne gä ho, nuꞌmu̱ go gi mꞌe̱gohu̱. Di adi gi huahnihu̱ nꞌa toꞌo gä ntunꞌmee”.

Dabid bi yꞌambäbi rꞌa de nuꞌu̱ yä soldado: “¿Te ma dä dähä näꞌä toꞌo dä hyo nuni filisteo ꞌne dä ñäni yä israelita de nunä rä mꞌe̱tsa?”.

Nꞌa soldado bi dädi: “Saul ma dä umbäbi ndunthi yä bojä, ꞌne ma dä umbäbi rä tꞌixu pa dä nthätui”.

Pe yä israelita xa mi tsu Goliat ngeꞌä xa mi nꞌa rä däta ñꞌo̱ho̱. Mi pe̱ꞌtsi ngu hñu metro rä ñhetsꞌi, ꞌne mi ñꞌoui nꞌa soldado näꞌä xki tuti rä eskudo.

Rꞌa yä soldado bi ma bä xipäbi Saul ge Dabid mi ne dä ma dä ntunkui Goliat. Pe Saul bi ꞌñembi Dabid: “Hinä, hindä za gi ma guä ntunkui. Goliat ya mä hämꞌu̱ xä nsoldado, ha nuꞌi gi bätsitho”. Pe Dabid bi dädi: “Nuga dä ho nꞌa oso ꞌne nꞌa zate ngeꞌä mi ne dä zipäbi yä de̱ti mä dada. Jeoba ma dä maxkägi pa gä ho näꞌä filisteo ja ngu dä ho nuꞌu̱ yä zuꞌue”. Hänge Saul bi ꞌñenä: “Gi ma, Zi Dada Jeoba dä maxꞌäꞌi”.

Dabid bi gäi ha rä hñe ꞌne bä jo ku̱tꞌa yä kongädo ꞌne bi yꞌu̱tꞌi ha rä murra. ꞌNepu̱ bi gu̱ rä ntꞌe̱ndo ꞌne bi bo̱tsꞌe pa dä ntunkui Goliat. Himi tsa dä gamfri Goliat mi hyandi xä mani Dabid. Mi hurämu̱i ge nguntꞌä ma xä hyo Dabid.

Goliat bi ꞌñembi Dabid: “Guä ekua, ri ngo̱ ma gä umbi yä tsꞌintsꞌu̱ ꞌne yä zuꞌue pa dä zi”. Pe Dabid bi dädi: “Nuꞌi xki ꞌñepu̱ ko ri majuai ꞌne ko ri lansa, pe nuga xti mabu̱ ko rä mfatsꞌi Zi Dada Jeoba. Nubye̱ Jeoba ma dä yꞌe̱ntꞌäꞌi ha mä yꞌe̱ ꞌne ma gä hoꞌi”.

Nubye̱, Dabid bi nextꞌi ha mi ꞌmai Goliat. Bi hñäi nꞌa do de ha rä murra, bi yꞌe̱ntꞌi ha rä ntꞌe̱ndo ꞌne ko ngatꞌho rä tsꞌe̱di bi yꞌe̱mbäbi Goliat. ¡Näꞌä do bi yu̱tꞌi ha rä de Goliat ꞌne bi huangi bi du! Mi hyandi yä filisteo näꞌä bi thogi Goliat, bi nextꞌi bi ma. Yä israelita bi nte̱hui ꞌne bi dähä näꞌä tuhniꞌä.