RI TÄQ filisteos xepe chi jumul chik che ubʼanik chʼoj kukʼ ri täq israelitas. Ri täq oxibʼ ratz ri David e kʼo che kixoʼl rajchʼoj Saúl. Rumal laʼ, xopan jun qʼij ri Jesé xubʼij wariʼ che David: ‹Chakʼama bʼi kaxlanwa chike awatz. Jawilaʼ la utz kiwäch›.

Chiʼ ri David xopan che kinaqaj, xbʼe chanim che kitzukuxik ri täq ratz jachiʼ, o ni, kok wi ri chʼoj. Ri jun nim raqan filisteo ubʼiʼ Goliat xok pa tzeʼ chikij ri israelitas. Tijan kubʼan wariʼ ronojel qʼij chiʼ ksaqarik xuqujeʼ ronojel chaqʼabʼ pa 40 qʼij. Xubʼij wariʼ: ‹Chichaʼ jun winaq rech kchʼojin wukʼ. We kchʼakanik xuqujeʼ kinukamsaj, öj kqabʼan ajpatinel chiwe. Tekʼuriʼ we in kinchʼakanik xuqujeʼ kinkamsaj, ix kibʼan ajpatinel qech. Chiwilaʼ jachin kitzukuj rech kubʼan wariʼ›.

David xuta wariʼ chike jujun täq ajchʼoj: ‹¿Su kyaʼ che ri winaq we kukamsaj wajun filisteo rech keʼuya ta pa kʼixbʼal ri Israel?›

‹Saúl kuya qʼinomal (bʼeyom) che›, jun chike ri ajchʼoj xubʼij wariʼ. ‹Xuqujeʼ kuya ri umiʼal che, rech kkʼuleʼ rukʼ.›

Tekʼuriʼ konojel ri täq israelitas kkexibʼij kibʼ che Goliat rumal che are jun nimalaj raqan. Xa jubʼiqʼ kraj che 3 metros raqan wajun achi xuqujeʼ jun chik achi rekʼam ri setesik chʼichʼ rech toʼbʼal re.

Jujun chike ri ajchʼoj xebʼe che ubʼixik che ri ajawinel Saúl che David kraj kchʼojin rukʼ Goliat. Tekʼuriʼ Saúl xubʼij che David: ‹Katkun täj. Rumal che at jun akʼal na, are kʼu ri Goliat ojer chik ajchʼoj›. David xubʼij wariʼ: ‹In xinkamsaj jun oso xuqujeʼ jun köj chiʼ xkekʼam bʼi ri täq chij rech nutat. Tekʼuriʼ wajun filisteo xa junam kukʼ wariʼ. Jehová kinutoʼ›. Rumal laʼ, Saúl xubʼij wariʼ: ‹Jat bʼaʼ, ri Jehová katutoʼ na›.

David xqaj bʼi che uchiʼ jun nimalaj jaʼ che usikʼik jobʼ abʼaj tekʼuriʼ xeʼuya bʼi pa umoral. Tekʼuriʼ xbʼe rukʼ ri uhonda rech kchʼojin rukʼ ri nimalaj raqan achi. Goliat xa xutzeʼj uwäch wariʼ. Xubʼij che xa kʼäx ta ukamsaxik ri David.

‹Chatpetoq›, xchaʼ Goliat, ‹Kinya kʼu ri abʼaqil chike ri chiköp›. Tekʼuriʼ David xubʼij: ‹At katpe wukʼ rukʼ ri nim raqan achʼichʼ, tekʼuriʼ in kinchʼojin awukʼ pa ubʼiʼ ri Jehová. Kimik Jehová katuya na pa nuqʼabʼ tekʼuriʼ katinkamsaj na›.

Kimik David xbʼe chanim rukʼ Goliat. Xresaj lo jun abʼaj pa umoral, xukoj che ri uhonda, tekʼuriʼ ko xukʼaqabʼej che ujolom Goliat. ¡Ri abʼaj xok pa ujolom ri Goliat, tekʼuriʼ xkamik! Chiʼ ri filisteos xkilo che xkam ri Goliat, xeʼanmajik. Ri täq israelitas xebʼe chikij rumal wariʼ xkechʼak ri chʼoj.