YAPATAWANMI Filistea runakunaqa hamurqaku Israel nacionpa contranpi peleanankupaq. Davidpa mayor kaq kimsa wawqenkunaqa Saulpa tropanpim kachkanku. Chaymi huk punchaw churin Davidta Isai nirqa: ‘Wawqekikunamanyá apay hamkatawan tantakunatapas chaynataq qawaramuy imaynam kasqankuta’ nispa.

Israelpa tropankunapa kasqanman chayaruspanmi Davidqa wawqenkunata maskarqa. Hatu-hatun Goliat sutiyoq Filistea runam lloqsiramurqa Israelpa tropankunata insultananpaq. Sapa madrugaw hinaspa sapa tarden 40 punchaw chaynata rurarqa. Hinaspam qaparispa nirqa: ‘Akllaychik huk kaqnikichikta ñoqawan peleananpaq. Venceruwaptinqa ñoqaykum kasaqku qamkunapa sirvientekichik. Ñoqa venceruptiymi ichaqa qamkuna sirvienteyku kankichik. Kunanmi desafiani chaynata ruranaykichikpaq’ nispa.

Chaymi Davidqa wakin soldadokunata tapurqa: ‘¿Imatataq qonqaku kay Filistea runata wañurachispa Israel tropakuna penqaypi kasqankumanta libraqmanqa?’, nispa.

Huk soldadoñataq nirqa: ‘Saulmi qori-qollqewan apuyachinqa hinaspa warmi churinwanpas casarachinqa’ nispa.

Llapallan Israel runakunam mancharisqallaña tarikurqaku Goliatqa hatu-hatun runa kasqanmanta. Sayayninqa yaqa 3 metrom karqa hinaspa harkachikunanta apaq soldadopas paywan rirqa.

Wakin soldadokunam rey Saulman willarqaku Davidqa Goliat sutiyoq runawan peleayta munasqanta. Saulñataqmi Davidta nirqa: ‘Manam peleayta atiwaqchu. Qamqa kanki warmaraqmi, wak runaqa guerrallapi puriqmi’ nispa. Davidñataq nirqa: ‘Ñoqam taytaypa ovejankunata huk leon chaynataq ukumari apakuptin wañurachiq kani. Wak Filistea runaqariki chay huk kaqnin animal hinallam. Jehová Diosmi librawanqa’ nispa. Chaymi Saulqa nirqa: ‘Chaynaqa riyá, Jehová Diosyá yanapasunki’ nispa.

Hinaptinmi Davidqa mayuman riruspa pichqa lluchka rumichata wayqanman hinakuykurqa. Hinaspanmi warakantin rirqa chay hatu-hatun runawan peleananpaq. Goliatqa Davidta qawaspa mana kaqpaqmi hapirurqa. Davidta chaylla wañurachinanpaq hinam tanteakurqa.

Chaymi Goliatqa nirqa: ‘¡Asuykamuwayá!, cuerpoykitam qosaq alton pawaq animalkunamanwan purunpi animalkunaman’ nispa. Hinaptinmi Davidñataq nirqa: ‘Qanmi ñoqaman hamuchkanki espadawan hinaspa lanzakunawan, ñoqam ichaqa qanman hamuchkani Jehová Diospa sutinpi. Kunanpunim qamta Jehová Dios makiyman churanqa, kunanpunitaqmi wañurachisqayki’ nispa.

Hinaptinmi Davidqa kallparqa Goliat runawan peleananpaq. Wayqanmanta huknin rumita horqoykuspanmi tukuy kallpanwan warakarurqa chay Goliat sutiyoq runata. Hinaptinmi Goliatpa urkunpi rumi kiñakuruptin pampaman wañusqa wichiykurqa. Valeroso soldadon wañurusqanta qawaykuspanku Filistea runakuna lluptikurqaku. Israelpa tropanñataqmi qatipaspanku vencerurqaku.