KUA aere akaou mai to Philiseti i te tamaki i to Iseraela. E toru o Davida tuakana i roto i te nuku vaeau o Saula. No reira i tetai ra kua karanga a Iese kia Davida e: ‘E apai koe i tetai titona tunu e tetai varaoa na toou au tuakana. Akara atu koe e te peea ua ra ratou.’

Te tae atu anga a Davida ki te puakapa o te nuku vaeau, kua oro atu aia i te kimi i tona au tuakana. Kua aere mai te tuputupua Philiseti ko Golia ki vao i te tatiaeae i to Iseraela. I rave ua ana aia i teia i te au popongi e te au aiai ravarai no te 40 ra. E ava ana aia e: ‘Iki mai i tetai o to kotou tangata kia tamaki mai iaku. Me re aia e me mate au iaia, ka riro matou ei tuikaa na kotou. Me re ra au e me mate aia iaku, ka tuikaa kotou na matou. Tuku mai ra i tetai tangata ei tamaki mai iaku.’

Kua ui a Davida ki tetai o te au vaeau e: ‘Eaa te ka rauka i te tangata te ka tamate i teia Philiseti e te ka takore i teia taakama anga ki to Iseraela?’

‘Ka oronga a Saula i te apinga nui nona,’ i karanga ai tetai vaeau. ‘E ka oronga katoa aia i tana uaorai tamaine ei vaine nana.’

Inara kua mataku pouroa to Iseraela ia Golia no te mea e maatamaata tikai aia. E 9 tapuae (mei te 3 mita) te roangarere iaia, e na tetai vaeau ke e apai ana i tona paruru tamaki.

Kua aere tetai au vaeau i te akakite ki te Ariki ko Saula e ka inangaro a Davida i te tamaki ia Golia. Inara kua karanga a Saula kia Davida e: ‘Kare koe e tau kia tamaki atu i teia Philiseti. E tamaiti ua rai koe, e e vaeau aia i tona oraanga pouroa.’ Pau mai a Davida e: ‘Kua ta au i tetai pea e te riona tei apai i te mamoe a toku papa. E ka aite teia Philiseti mei te reira rai. Ka tauturu mai a Iehova iaku.’ No reira kua karanga atu a Saula e: ‘Aere ra, na Iehova koe e tauturu.’

Kua aere a Davida ki raro i tetai kauvai e kua rave mai e rima toka mania, e kua tuku ki roto i tana pute. I reira kua rave mai aia i tana maka e kua aere atu i te aravei i te tuputupua. Te kite mai anga a Golia iaia, akavaavaa tikai aia. Manako aia e ka mama ua i te tamate ia Davida.

‘Aere mai ra ki konei iaku,’ i karanga ai a Golia, ‘e ka oronga au i toou kopapa ei kai na te manu e te manu o te reva.’ Inara karanga a Davida e: ‘Te aere mai nei koe e te koke, te korare e te ko, te aere atu nei ra au kia koe ma te ingoa o Iehova. Teia ra ka oronga mai a Iehova ia koe ki roto i toku rima e naku koe e tamate.’

I reira kua oro atu a Davida ki ko ia Golia. Kua rave mai i te toka i roto i tana pute, tuku ki roto i tana maka e kua pei i te reira ma tona ririnui pouroa. Kua tae tika atu te toka ki roto i te rae o Golia, e kua topa aia ki raro kua mate! I te kite anga te Philiseti e kua mate to ratou tumutoa, kua oro ratou pouroa. Kua arumaki to Iseraela ia ratou e kua autu i te tamaki.